नेपालमा मातृ तथा बाल स्वास्थ्यमा सुधार हुँदै, दुई दशकमा परिवार नियोजन दर  ५३ प्रतिशतले वृद्धि

काठमाडौं, २७ कात्तिक– नेपालमा मातृ तथा बाल स्वास्थ्यमा सुधार हुदै गएको राष्ट्रिय स्वास्थ्य सर्वेक्षणले देखाएको छ ।

काठमाडौंमा सोमबार आयोजित राष्ट्रिय सम्मेलनमा सार्वजनिक गरीएको सन् २०१६ को नेपाल जनसाँख्यिक तथा स्वास्थ्य सर्वेक्षण अनुसार  नेपालमा हाल पाँच वर्ष मुनिका बाबाललिकाको मृत्युदरमा कमी आएको छ । सन् १९९६ मा प्रति हजार जीवित जन्मिएका शिशुमध्य १ सय १५ जनाको मृत्यु भएको थियो । सो मृत्यु दर सन् २०१६ मा तीनगुणाले घटेर ३९ मा झरेको छ । 

सर्वेक्षणका अनुसार अझै पनि नेपालमा २५ जना जीवित जन्मिएका बच्चामध्ये १ जनाको पाँच वर्ष अघि नै मृत्यु हुने गरेको छ । नेपालले दिगो विकास लक्ष्य अन्तरगत २०३० सम्ममा पाँच वर्ष मुनिका बालबालिकाहरुको मृत्युदर प्रति हजार २० घटाउने प्रतिबद्धता गरेको छ । 

यस्तै गर्भवति सेवा लिने महिलाहरु पनि बढ्दै गएको तत्थ्याङ्कले देखाएको छ ।  सन् २००१ मा गर्भवति भएका १० जना महिला मध्य ३ जनाले मात्रै दक्ष प्रसूतिकर्मीबाट सेवा लिने गरेकोमा २०१६ मा  धेरै महिलाहरुले सेवा लिएका छन् । सन् १९९६ मा ८ प्रतिशत बच्चा मात्रै स्वास्थ्य संस्थामा जन्मने गरेकोमा २०१६ सम्ममा ५७ प्रतिशत बाच्चाहरु स्वास्थ्यसंस्थामा जन्मिएको तत्थ्याङ्कमा उल्लेख गरीएको छ । 
नेपालमा अझै पनि १० जना बच्चा मध्ये ४ जना बच्चाहरु घरमै जन्मने गरेको पाइएको तथ्याङ्कले देखाएको छ ।

दुई दशकमा नेपालमा प्रजनन् दर आधा भन्दा बढिले घटेका तत्थ्याङले देखाएको छ । सन् १९९६ मा प्रति महिला सरदर ४ दशमलब ६ बच्चा जन्मन्थे भने २०१६ मा २ दशमलब ३ मात्रै रहेको छ । परिवार नियोजनाको साधन तथा सेवाको पहुँच र प्रयोगमा बृद्धि भएकोले प्रजनन् दर घटेको सर्वेक्षणको निश्कर्ष छ ।

नेपालमा दुई दशकमा परिवार नियोजनको प्रयोग दर ५३ प्रतिशतले वृद्धि भएको छ । 
 

कात्तिक २७, २०७४ मा प्रकाशित

प्रतिक्रिया दिनुहोस