मुख्य समाचार

राती अबेरसम्म पनि  पाटन औद्योगिक क्षेत्रको  आगलागी नियन्त्रणमा आउन सकेन

ललितपुर, २८ कातिक - पाटन औद्योगिक क्षेत्रमा रहेको प्लाष्टिक कारखानामा आज साँझ ६ बजेदेखि सुरु भएको  आगलागी  राती अबेरसम्म पनि नियन्त्रणमा आउन सकेको छैन  ।  जुद्ध बारुण यन्त्रका  प्रमख बुद्धिमान नगरकोटीले राती १० बजेसम्म ७५ प्रतिशत आगो नियन्त्रणमा लिइएको बताए । उनका अनुसार  आगलागी नियन्त्रणको लागि  प्रयास जारी  छ । 

काठमाडौँ, ललितपुर महानगरपालिकाका दमकल, त्रिभुवन विमानस्थल, निजी पानी ट्यांकरको पानी प्रयोग गरी आगो नियन्त्रणको प्रयास भइरहेको हो । 
 

आगलागीको कारण हालसम्म पत्ता लाग्न नसकेको महानगरीय प्रहरी परिसर ललितपुरका प्रहरी नायब उपरीक्षक नरेन्द्र चन्दले बताए  ।

आगलागीका कारण उद्योगमा रहेका तयारी सामग्री, कच्चा पदार्थ जलेर नष्ट भएका छन् । 

आगलागीका कारण आनन्द प्लाष्टिक उद्योग र पञ्चकन्याको युपिभिसी उद्योगमा क्षति पुगेको छ । क्षतिको विस्तृत विवरण भने प्राप्त भएको छैन ।

केहि दिनअघिमात्रै पनि त्रिपुरेश्वरस्थित एक मोटरसाइकल वर्कशपमा आगलागी  हुँदा एक जनाको मृत्यु भएको थियो । 

कात्तिक २८, २०७४ मा प्रकाशित

प्रतिक्रिया दिनुहोस