काठमाडौं १८ असोज– बैकल्पिक राजनीतिक धार निर्माण गर्न भन्दै बामपन्थी राजनीति त्यागेर नयाँ शक्ति नामक राजनीतिक पार्टी गठन गरेका पूर्वप्रधानमन्त्री डा बाबुराम भट्टराई फेरि वामपन्थी राजनीतिमा फर्किएका छन् ।

संविधान सभाबाट नयाँ संविधान जारी भएलगत्तै २०७२ असोजमा बाबुरामले माओवादी पार्टी परित्याग गरेर नयाँ शक्तिको स्थापना गरेका थिए ।

माओवादी आफूसँगै आएका केही नेता माओवादीमै फर्किएपछि एक्लिएका बाबुरामलाई वामपन्थी गठबन्धनबाट राजनीतिक पुर्नजीवन प्राप्त भएको छ ।

गोरखा क्षेत्र नम्बर २ बाट चुनाव लड्ने तयारी गरेका बाबुराम भट्टराइलाई पराजीत गर्न माओवादी केन्द्रले नारायणकाजी श्रेष्ठलाई सोही क्षेत्रबाट उठाउने तयारी गरेको थियो । केही दिन पहिले मात्र माओवादीका शीर्ष नेताहरु गोर्खा पुगेर चुनावी तयारी गरेका थिए ।

नयाँ गठबन्धनपछि बाबुराम गोर्खा २ बाट चुनाव लड्ने पक्का भएको छ । तीन दलबीच भएको ६ बुँदे सहमतिका एक हस्ताक्षरकर्ता भएकोले गोरखा २ मा बाबुरामले छाडेमात्र नारायणकाजीले पाउनेछन् ।

गोरखा २ बाट बाबुराम उठ्ने पक्का जस्तै भएकोले नारायणकाजी गोरखा १ या अन्यत्रबाट चुनाव लड्ने छन् । बाबुराम दुई पटक नै गोर्खाबाट चुनाव जितेका थिए भने नारायणकाजी पहिलो संविधानसभामा मनोनितबाट सभासद बनेका थिए । दोस्रो संविधान सभामा भने मकवानपुरबाट चुनाव हारेका थिए ।

नयाँ गठबन्धन गरेसँगै बाबुरामको पार्टीले प्रतिनिधि सभाका प्रत्यक्ष तर्फका १ सय ६५ मध्ये कम्तिमा पाँच सिट पाउने दावी गरेको छ । एमाले र माओवादीले भागवण्डा गरेको ६०÷४० को हिस्साबाट बाबुरामले ५ सिट पाउने छन् ।
नयाँ शक्तिले गोरखा, रसुवा, कपिलवस्तु, कैलाली र सप्तरीबाट उम्मेदवार उठाउने तयारी गरेको सो पार्टीका एक नेताले लोकान्तरलाई बताए । स्थानीय तहको चुनावमा नयाँ शक्तिले सप्तरी र रसुवामा एक÷एक एक गाउँपालिका अध्यक्ष जितेको थियो ।

नयाँ शक्तिले रसुवाबाट प्रेम तामाङलाई उठाउने तयारी गरेको छ ।

---

---