‘ऐश्वर्य’का ‘डन’, जो आफैंलाई चिन्दैनन्

असोज २८, २०७४ काठमाडौं, २८ असोज– र्याम्प मोडल प्रशान्त ताम्राकार यतिबेला चलचित्र ‘ऐश्वर्य’ को ट्रेलरबाटै चर्चामा छन् । चलचित्र ‘एश्वर्य’ मा खलनायकका रूपमा देखिएका ताम्राकार पेशाले फेसन डिजाइनर, –याम्प मोडल, इभेन्ट म्यानेजरका रुपमा पनि परिचित छन् । अहिले भने उनलाई कलाकारका रुपमा पनि दर्शकले ‘नोटिस’ गर्न थालेका छन् । चलचित्र रिलिज नहुँदै आफूले पाएको चर्चाले गर्दा यतिबेला उनी आशावादी छन् ।prashant tamrakar

फेसन डिजाइन प्रशान्त प्रायः वास्तविक जीवनमा पनि फरक गेटअपमा भेटिन्छन् । चलचित्र एश्वर्यमा पनि उनको गेटअपको राम्रै प्रशंसा हुने गरेको छ । फिल्ममा केही फरक शैलीमा देखिएका ताम्राकारले लगाउने पहिरन भने साधारण नै हुने गर्छ । ‘बरु मेरो हेयर स्टाइल फरक हुनसक्छ तर ड्रेस सामान्य नै हुन्छ ।’, हाफ पाइन्ट, चप्पल र साधारण कमिजमा भेटिएका प्रशान्त सुनाउँछन्, ‘यस्तै सामान्य पहिरनमा हिँड्न सहज लाग्छ ।’

चलचित्र ‘ऐश्वर्य’ को रिलिज मितिको प्रतीक्षामा रहेका प्रशान्तलाई आफूले चौंथो फिल्मसम्म काम गर्दा पहिलेभन्दा फरक लागेको अनुभव सुनाउँछन् ।
खलनायकका रुपमा चलचित्रमा देखिएका प्रशान्तलाई फिल्म शूटिङ गर्दा नै धेरैले राघबको नामले बोलाउने गरेको उनी स्मरण गर्छन् । चलचित्रमा राघबजंग जबराको भूमिकाको प्रस्ताव आउँदा आफूलाई उक्त भूमिका निभाउन सक्छु भन्ने नलागेको प्रशान्त बताउँछन् । ‘शुरुमा त म आफैलाई विश्वास थिएन, पछि मेकअप ब्यायले मेकअप गर्दागर्दै तपाईको हाउभाउ राघबको भइसक्यो भन्न थाल्यो,’ ताम्राकार आफ्नो चरित्रका बारेमा बताउँदै भन्छन्, ‘म फिल्मको पात्रमा यति डुबेछु कि, म प्रशान्त ताम्राकार हुँ भन्ने नै भुल्थें ।’

चलचित्रमा उनी अभिनेता रमेश उप्रेतीको विरुद्धमा देखिएका छन् । यतिबेला उनलाई के कुराले खुशी दिलाएको छ भने ट्रेलरमा देखिएको लुक्स नै धेरै दर्शकका लागि चासोको विषय बनेको छ । उनी यो चलचित्रमा दर्शकले आफूबाट धेरै आशा राखेको बताउँछन् । उनी आफ्नो चरित्रलाई शत–प्रतिशत न्याय गरेको पनि दाबी गर्छन् ।

‘म आफैले पनि धेरै आशा गरेको फिल्म हो यो । र, अहिले दर्शकले पनि मबाट आशा गर्नुभएको छ ।’ उनी सुनाउँछन्, ‘यो भूमिकाको अफर आउँदा म आफैलाई आत्मबल थिएन । ’

आत्मबल थिएन । अर्थात, शुरुमा चलचित्रमा राघबको बारेमा सुन्दा नै उनलाई विश्वास लागेको थिएन । निर्देशकको प्रस्तावलाई पनि अस्वीकार गर्न गाह्रो भएको थियो । ‘फिल्ममा मलाई दिइएको भूमिका सुनेर सोधें, के यो भूमिका मैले गर्न सक्छु भन्ने लाग्छ तपाईलाई?’ उनी थप्छन्, ‘मेरो प्रश्नमा उहाँहरुले तपाईंको विकल्प नै छैन भन्दिनुभयो, आफैलाई राघबको भूमिका निभाउन सक्छु भन्ने विश्वास मलाई भन्दा धेरै उहाँहरुलाई थियो ।’

‘अहिले भने फिल्ममा आफैले गरेको अभिनय देख्दा मैले आफैलाई चिन्दिन, फिल्ममा भएको ‘म’ आफू नभएर चरित्रको राघब हो कि झैं लाग्छ ।’, उनी मुस्कुराउँदै सुनाउँछन् ।

चार चलचित्रमा अभिनय गरिसके पनि उनलाई कलाकार भनेर चिनाउन भने अझै पनि असहज लाग्ने बताउँछन् । इभेन्ट म्यानेजर र मोडलका रुपमा धेरैले चिनिसके पनि कलाकार भनेर आफूलाई अझै दर्शकले स्वीकार नगरिसकेको उनी बताउँछन् । ‘कलाकार बन्छु भनेर बन्ने कुरा होइन, यो त दर्शकले स्वीकार्ने कुरा हो ।’ उनी थप्छन्, ‘मलाई अझै पनि धेरैले कलाकारका रुपमा चिन्नुभएको छैन, चलचित्र ऐश्वर्यले मेरो करिअर (वृत्ति) लाई फाइदा पु–याउनेछ ।’

विदेशी बजारमा नेपाली चलचित्रको बजार विस्तार गर्न धाउन्नमा लागेका प्रशान्तले नेपाली चलचित्रमा विदेशी चलचित्रको बजार प्रवद्र्धन गर्ने काममा पनि जुटेका छन् ।
भविष्यमा समेत नेपाली चलचित्र र यसको विकासमा निरन्तर रुपमा लागिरहने बताउँछन् उनी । ‘केही समय त कलाकारकै रुपमा काम गर्छु, पछि भने आफै फिल्म निर्माण गर्ने सोच छ,’ प्रशान्त थप्छन्, ‘कमै फिल्ममा अभिनय गरे पनि कुनै न कुनै तरिकाले फिल्मसँग जोडिएकै छु ।’
ADVERTISEMENT

असोज २८, २०७४ मा प्रकाशित

प्रतिक्रिया दिनुहोस