कलाकार/विश्लेषकका बुझाइमा विश्वप्रकाश शर्मा बलियो कि राम कार्की ?

कात्तिक २३, २०७४

झापा, २३ कात्तिक– प्रदेश र प्रतिनिधिसभा निर्वाचनले झापा जिल्लाको माहोल तातेको छ । राष्ट्रिय राजनीतिका चर्चित व्यक्तिहरू चुनावी प्रतिस्पर्धामा उत्रिएकाले पनि धेरैका आँखा झापातर्फ सोझिएका छन् । 
जिल्लाको क्षेत्र नं. १ मा सञ्चारमन्त्री समेत भइसकेका माओवादी केन्द्रका राम कार्कीले वाम गठबन्धनका तर्फबाट उम्मेदवारी दिएका छन् भने सोही क्षेत्रमा नेपाली कांग्रेसका तर्फबाट विश्वप्रकाश शर्मा चुनावी मैदानमा उत्रिएका छन् ।

शर्मा नेपाली कांग्रेसका चर्चित र लोकप्रिय युवा नेता मानिन्छन् । कार्की माओवादीमा बौद्धिक नेता (मार्क्सवादको व्याख्याताका) रूपमा चिनिन्छन् । त्यसैले यी दुई नेताबीचको चुनावी भिडन्त धेरैका लागि रोचक बनेको टिप्पणी भइरहेका छन् ।


ADVERTISEMENT

स्थानीय स्तरमा राम्रो पकड बनाएका कार्की र शर्मा दुवै आफ्नो जीत हुनेमा विश्वस्त देखिन्छन् । तर ‘मत’ का आधारमा कसले बाजी मार्ला ? धेरैको जिज्ञासा छ ।  

कला,  साहित्य, चिकित्सा क्षेत्र, समाजसेवा लगायतमा क्रियाशील झापाका अग्रज व्यक्तित्वले शर्मा र कार्कीलाई आफ्नै तरिकाले बुझेका छन् । 

झापा मूल घर भएका तर राष्ट्रिय स्तरमा कुनै न कुनै कामले चर्चित केही व्यक्तित्वलाई सम्पर्क गरेर हामीले शर्मा र कार्कीको चुनावी भिडन्तका बरेमा प्रतिक्रिया लिएका छौं ।

सवैभन्दा पहिले झापा स्थायी घर भएका चर्चित हास्यकलाकार सीताराम कट्टेल (धुर्मुस) सँग कुरा ग–यौं । तर उनले चुनावले आफूलाई खासै प्रभाव नपारेको प्रतिक्रिया दिए । 

गत असारमा तराईमा आएको बाढीले प्रभावित रौतहटको चन्द्रपुर नगरपालिकाको सन्तपुरमा ‘एकीकृत नमूना सन्तपुर बस्ती’ निर्माण गरिरहेका धुर्मुस) यतिबेला कुञ्जना घिमिरे (सुन्तली) सँगै बस्ती निर्माणको चटारोमा छन् । 

‘चुनावबारे खासै जानकारी नै छैन, माघमा हस्तान्तरण गर्ने गरी दिनरात काम गरिरहेकाले पनि हामीलाई भ्याईनभ्याई छ’, सीताराम भन्छन्, ‘बाढीपीडितको पीडा एकातिर छ, अहिले हामीलाई चुनावभन्दा यो बस्ती महत्त्वपूर्ण छ । दुईसय पचास जनशक्ति लिएर निरन्तर काम गरिरहेका छौं’, उनले भने । 

नेपाल प्रज्ञा प्रतिष्ठानका उपकुलपति तथा साहित्यकार विष्णुविभु घिमिरेले झापा क्षेत्र नम्बर १ का मतदाताले विश्वप्रकाशलाई बढी भोट दिन सक्ने सम्भावना रहेको लोकान्तरलाई बताए ।

‘झापाका मतदाताले चर्चाका हिसाबले राम कार्कीलाई चिन्लान् तर विश्वप्रकाशले आफ्नै गाउँमा बसेर सक्रिय भई जनताको मन जितेका छन्, त्यसैले पनि उनले जित्ने सम्भावना बढी देखिन्छ,’ घिमिरे भन्छन्, ‘राम कार्की सञ्चारमन्त्री त हुनुभयो तर झापालीको मन जिते जस्तो लाग्दैन । विश्वप्रकाशलार्ई प्रत्येक मान्छेले चिन्छ, प्रत्येक घरले चिन्छ ।’

तक्मे बूढाका नामले परिचित विल्सनविक्रम राई भने यतिबेला झापामै छन् । झापामा देखिएको चुनावी रौनक उनलाई सामान्य लागेको छैन । झापा–१ बाट चुनावी मैदानमा उत्रिएका विश्वप्रकाश शर्मा र राम कार्की दुवैलाई उनले सचेत नेताका रूपमा बुझेका छन् । 

‘धेरै मन्त्रीहरू हाँस्दा पनि पैसा खर्च हुन्छ झैं गर्नुहुन्छ, संयोगवश मैले राम कार्की र विश्वप्रकाश शर्मा दुवैसँग भेट्ने मौका पाएको छु । दुवै खुला स्वभावको हुनुहुन्छ’, राई थप्छन्, ‘विश्वप्रकाश शर्माले झापामा स्वास्थ्य महोत्सव गर्नुभएको थियो । उहाँको ‘भिजन’ र ‘व्यवहार’ ले मन छोएको थियो, मेरो बुझाइमा उहाँ सक्षम र सरल मान्छे हुनुहुन्छ ।’ 

माओवादी केन्द्रका नेता कार्की पनि सरल व्यक्तित्व भएको राईको बुझाइ छ । 

‘राम कार्की पनि उत्तिकै मिलनसार हुनुहुन्छ । तर झापाका जनताले कसलाई चुन्छन्, अड्कल गर्न गाह्रो छ’, विल्सनले सुनाए । 

चिकित्सक तथा साहित्यकार रामेश कोइरालाको मत भने भिन्नै देखियो । झापा–१ बाट विश्वप्रकाश शर्माले जित्नुपर्ने कोइरालाले बताए । दुवैसँग व्यक्तिगत रूपमा चिनजान भएपनि कांग्रेसभित्रका पाँच राम्रा व्यक्ति चुन्नुपर्दा विश्वप्रकाशलाई छान्न सकिने कोइरालाले उल्लेख गरे ।

‘दुःखको कुरा, अहिले पार्टीमा राम्रा नेता छैनन् । पार्टीभन्दा पनि विश्वप्रकाश जस्ता नेताको जरूरत छ’, कोइराला थप्छन्, ‘राम कार्की झापाको हुनुहुन्छ भन्ने पनि थाहा थिएन । विश्वप्रकाश त्यहीँका रैथाने पनि हुन् र आफ्नो क्षेत्रका लागि धेरै गरेका छन् ।’

अर्का विश्लेषक जुगल भुर्तेलले झापामा कार्की र शर्मा दुवै उम्मेदवार राम्रो भएको प्रतिक्रिया दिए । 

तर झापा–१ लाई हेर्ने हो भने विश्वप्रकाश शर्माले बाजी मार्ने सम्भावना प्रबल  रहेको भुर्तेल बताउँछन् । ‘राम दाइ क्षेत्र–२ बाट लड्नुपर्ने थियो । दुवै राम्रा उम्मेदवार मैदानमा उत्रिदा हामीलाई गाह्रो छ, झापा¬–१ लाई हेर्ने हो भने विश्वप्रकाश पाँच वर्षदेखि जनतासँग साक्षात्कारमा छन्’, भुर्तेलले थपे, ‘विश्वप्रकाशलाई काठमाडौंमै बस्छु भने पनि पुग्थ्यो । तर उनी पाँच वर्षदेखि आफ्नै क्षेत्रका जनताका लागि खटिएका छन् ।’

अहिले मुलुकमा बहुलवादी संस्कृतिलाई बुझेर सबैलाई मिलाएर लैजानसक्ने नेताको आवश्यकता भएको र त्यस्तो खुबी विश्वप्रकाशमा भएको भुर्तेलको भनाइ छ । 

‘राम कार्की पनि उस्तै हुनुहुन्छ, उहाँ क्षेत्र–१ बाट नउठ्नुपर्थ्यो, अहिले हामीले राम्रामध्येको एकलाई गुमाउनुपर्ने अवस्था आयो,’ भुर्तेलले थपे ।

तर झापा–१ मा विश्वप्रकाश शर्माले गरेको सहयोग र उनको व्यक्तित्वले उक्त क्षेत्रमा उम्मेदवारी दिने आधार शर्मासँग भएको भुर्तेलको तर्क छ । 

पूरै झापा जिल्लालाई वामपन्थी गढका रूपमा पनि हेर्ने गरिन्छ । एकातिर झापा आन्दोलन सधैं चर्चामा रहन्छ भने अर्कोतर्फ राष्ट्रिय राजनीतिलाई अगुवाइ गरिरहेका पूर्वप्रधानमन्त्री एवं नेकपा एमालेका अध्यक्ष केपी शर्मा ओलीको जिल्ला भएकाले पनि झापा चर्चित जिल्लामै पर्छ । 

ओलीपछि आरके मैनाली, सीपी मैनाली लगायतका वाम नेता पनि झापा जिल्लाकै हुन् । प्रदेशसभा र प्रतिनिधिसभाको चुनावमा एमाले र माओवादीले ‘वाम गठबन्धन’ बनाएर संयुक्त रूपमा चुनाव लडिरहेका छन् । 

यस्तो अवस्थामा विश्वप्रकाश शर्मा र राम कार्की आफ्नो पक्षमा  मत तान्न चुनावी प्रचारमा सक्रियतापूर्वक लागिपरेका भेटिन्छन् ।

कात्तिक २३, २०७४ मा प्रकाशित

अर्घेलो थापा

अर्घेलो लोकान्तरका कला संवाददाता हुन् । 

लेखकबाट थप...

प्रतिक्रिया दिनुहोस