प्रतिनिधि/प्रदेशसभाको दोस्रो चरणको निर्वाचन भोलि बिहीवार हुँदैछ । मुलुकका ४५ जिल्लामा प्रतिनिधिसभातर्फ १ सय २८ र प्रदेशसभाका २ सय ५६ निर्वाचन क्षेत्रमा चुनाव हुनेछ । 

निर्वाचनको सम्पूर्ण तयारी पूरा भएको र निर्धक्कसँग मतदान गर्न निर्वाचन आयोगले आम मतदातालाई आह्वान गरेको छ । भोलि हुने निर्वाचन नयाँ संविधान कार्यान्वयनको सबभन्दा महत्त्वपूर्ण चरण हो । 

देशका विभिन्न भागमा भइरहेका विस्फोटका घटनाका बाबजुद मतदाताहरू भोट हाल्नका लागि आतुर देखिएका छन् । मतदाताहरूमा देखिएको अभूतपूर्व उत्साह लोकतन्त्रको स्थायित्वको लागि सुन्दर पक्ष पनि हो ।

एक दशक लामो संक्रमणकाल अन्त्य गरेर राजनीतिक स्थिरता र मुलुकको आर्थिक समृद्धिको प्रवेशद्वारका रूपमा लिइएको प्रतिनिधिसभा र प्रदेशसभा निर्वाचनको संघारमा मुलुक छ । एक करोड २२ लाख ३९ हजार ९ सय ९३ मतदाताले बिहीवार प्रयोग गर्ने विवेकले नेपालको भविष्यको मार्गचित्र कोर्नेछ । 

मतदाताले गर्ने विवेक प्रयोगले नेपाल समृद्धिको मार्गमा लैजानेछ, देशलाई सुशासन र विकासको मार्गमा डोहो–याउनेछ । यसर्थ सचेत नागरिकले मतदानमा सहभागी हुनैपर्छ । यो निर्वाचनलाई अपार सफल पार्नुपर्छ ।

संविधानसभाले बनाएको नयाँ संविधानअनुसार पहिलोपटक प्रतिनिधिसभा र प्रदेशसभाको चुनाव हुन लागेको हो । प्रदेशसभाको चुनाव नेपालमा पहिलोपटक हुँदैछ । 

स्थानीय तहको निर्वाचन सम्पन्न भइसकेको अवस्थामा प्रदेशसभाको चुनावले संघीयताको कार्यान्वयनलाई मूर्त रूप दिनेछ । 

राजनीतिक दलहरूले चुनाव प्रचारका क्रममा एउटै विषयलाई जोड दिएका थिए – राजनीतिक स्थायित्व र आर्थिक समृद्धि । आम मतदाताको अपेक्षा पनि राजनीतिक स्थायित्व र आर्थिक समृद्धि होस् भन्ने नै छ । यसर्थ निर्वाचनको नतिजा जुन दलको पक्षमा आएपनि लोकतन्त्रको विजय हुनेछ । भोलि हुने नयाँ निर्वाचनले देशलाई संक्रमणको युगबाट स्थायित्वको युगमा लैजानेछ । समृद्धिको युगमा प्रवेश गराउनेछ ।

युग परिवर्तन गराउने यो महासंग्राममा सक्रियतापूर्वक सहभागी हुनु सचेत नागरिकको दायित्व हो । मतदातालाई भयरहित वातावरणमा मतदान गर्ने वातावरण बनाउनु राजनीतिक दलको कर्तव्य र जिम्मेवारी हो ।