कविता -कमरेड दासनुदास !

मंसिर २८, २०७४

शरद पौडेल

म हनुमान !
कत्ति उत्तेजित छैन कमरेड !
जे उचित लाग्छ  कमरेडलाई
आजको उचित
र मेरो उचित पनि त्यहि नै हो ।
र लाग्छ जे खराब हजुरलाइ
सोच्न र सोध्नै पर्दैन मलाई
शतप्रतिशत खराव पनि त्यहि नै हो  ।


ADVERTISEMENT

म हनुमान !
मलाई 
आँफैले सोच्ने बिचार्ने लेठो नदिईयोस ।
के बोक्ने हो ? कति बोक्ने हो ?
आज्ञा मात्र होस
भ्याए जति सामर्थ्यले 
म बोक्नेछु र हिंड्नेछु कमरेड !
अहं 
म माथि किमार्थ शंका नगरियोस 
म हनुमान !
मलाई चाकरीमै रमाउन दिईयोस । 

रङको भेउ भएन कमरेड
हजुरको रातो 
मेरो पनि रातो ।
हजुरको कालो 
मेरो पनि त कालो ।
कसरी बन्छन 
हजुरका रात 
मेरा लागि दिनहरू ?
कसरी बन्छन र
हजुरका दिन 
मेरा लागि रातहरू ?

म हनुमान हुँ कमरेड ! 
मलाई भजन गाऊन दिईयोस 
मलाई त आरती गर्न दिईयोस ।
अहं बिचार्न नभनियोस केहि 
तामेलिका लागि 
केवल केवल आदेश दिईयोस ।
केवल केवल फर्मान दिईयोस ।।

मंसिर २८, २०७४ मा प्रकाशित

प्रतिक्रिया दिनुहोस