बुटवल, २८ पुस – नेपालमा प्रायः निजी विद्यालयहरूले मात्र विद्यार्थी बोक्नका लागिस्कूल बसको प्रयोग गर्छन् । तर, रुपन्देहीका केही सामुदायिक स्कूलले आफ्नै खर्चमा गाडी खरिद गरी विद्यार्थीहरूलाई सेवा दिइरहेका छन् । रूपन्देहीका चार वटा सामुदायिक विद्यालयले स्कूल बस भित्राएर विद्यार्थी ओसार–पसार गराउन थालेका हुन् । जसले गर्दा अभिभावकहरू पनि आफ्ना बालबच्चा गाडीमा विद्यालय जान पाएपछि सुरक्षाको महशुस गरेका छन् । 

बुटवल–१० स्थित कालिका मावि, बुटवल–३ स्थित कान्ति मावि र तिलोत्तमा–५ स्थित शान्ति नमुना माविले टाढा–टाढाका विद्यार्थी बोक्न बसको व्यवस्था गरेका हुन् । यी विद्यालय उत्कृष्ट सामुदायिक विद्यालयमा समेत पर्छन् । कम शुल्क लिएर विद्यार्थीलाई बसको व्यवस्था विद्यालयहरूले गरेका हुन् । 

नर्सरीदेखि कक्षा १० सम्म नै अंग्रेजी माध्यमबाट पठन–पाठन हुने यी विद्यालयले  बसको व्यवस्था गरेपछि अभिभावकहरु थप ढुक्कको महशुस गर्न थालेका छन् ।  ‘विद्यालयको शैक्षिक गुणस्तर देखेर धेरै अभिभावकले छोरा÷छोरी पढाउन चाहेका छन्’ कालिका माविका प्राचार्य घनश्याम पाठकले भने, ‘अधिकांश अभिभावकले छोराछोरी विद्यालयमा ल्याउन र पु¥याउन समय नभएर यहाँ पढाउन वञ्चित भएका थिए । यो समस्यालाई सम्बोधन गर्न बसको व्यवस्था गरियो ।’ प्राथमिक तहका बाल÷बालिकालाई बसको सुविधा दिने विद्यालयहरूले जनाएका छन् ।

कालिका स्कुलका ३ वटा बस छन् । एउटा गाडी भारतीय राजदूतावासको दिएको हो । एउटा नेपाल सरकारको भन्सार छूटमा ल्याएको हो भने, अर्को विद्यालयले आफ्नै लगानीमा खरिद गरेको हो । विद्यालयमा सैनामैना नगरपालिकाको बाँसगढी, देवदहको खैरेनी र तिलोत्तमाको मणिग्रामसम्मबाट विद्यार्थी पढ्न आउने गर्छन् । विद्यालयमा ४ हजार ३ सय भन्दा बढी अध्ययनरत छन् । 

तिलोत्तमाको शान्ति नमूना माविले पनि बसको व्यवस्था गरेको छ । विद्यालयमा अध्ययन गर्र्नेमध्ये अधिकांश निम्न वर्गका अभिभावकका छोराछोरी भएकोले उनीहरूलाई सहज रूपमा विद्यालयमा ल्याउनका लागि बसको प्रयोग गरिएको प्राचार्य कूलप्रसाद लामिछानेले बताए । 

‘हामीले  विशेष गरी कक्षा ५ सम्मका विद्यार्थीहरूलाई लक्षित गाडी सञ्चालनमा ल्याइएको हो’ लामिछानेले भने, ‘अहिले एउटा गाडी छ । छिट्टै अर्को बस ल्याउने तयारीमा छौँ । बस सुविधा भएपछि विद्यार्थी अझै बढ्ने आशा गरेका छौँ ।’ गाडीको सुविधा भएपछि ८ किलोमिटर टाढाबाट पनि विद्यार्थी विद्यालयमा पढ्न आउने गरेका छन् । 

त्यस्तै बुटवलस्थित कान्ति माविले पनि ३ वटा गाडी प्रयोगमा ल्याएर विद्यार्थीलाई सेवा दिइरहेको छ । विद्यालयको एउटा आफ्नै गाडी र दुई वटा भाडामा लिएर सञ्चालनमा ल्याएको छ । विद्यालयका प्राचार्य गोविन्द ज्ञवालीले टाढाका विद्यार्थी विद्यार्थीहरूलाई लक्षित गरी स्कूलले गाडीको व्यवस्था गरेको बताए । 

‘विद्यालयलाई आवश्यकता पनि भयो’ प्राचार्य ज्ञवालीले भने, ‘अभिभावकहरूले पनि आफ्नो बच्चा स्कूल पुग्यो कि पुगेर भनेर चिन्ता हुन्छ । विद्यालय छुट्टी भएपछि घर नआउने जस्ता समस्याबाट मुक्त गराउन हामीहरूले योजनाका साथ गाडी राखेको हो ।’ 

विद्यालयले गाडी राखेपछि २२ किलोमिटर पश्चिम सालझण्डीसम्मबाट विद्यार्थीहरू अध्ययनका लागि आउने गरेका छन् । कान्तिले २०७० सालदेखि भाडामा गाडी राखेको विद्यार्थी बोक्न शुरु गरेको हो । 

त्यस्तै शिवपुर माविले पनि भाडामा गाडी लिएर विद्यार्थी बोक्दै आएको जनाइएको छ । स्कूल बस सञ्चालनसँगै चार वटै विद्यालयमा निजी विद्यालयहरु छोडी भर्ना हुन आउने विद्यार्थीहरुको संख्यामा वृद्धि भएका विद्यालयहरूको जनाएका छन् । 

त्यस्तै नवीन औद्योगिक कदरबहादुर रीता माविले पनि आवश्यकताअनुसार गाडी राख्न सकिने बताएको छ । विद्यालयका प्राचार्य प्रेमबहादुर बस्नेतले तिनाउ पारिका विद्यार्थीहरू ल्याउन आफूहरू गाडी खरिद गर्ने तयारीमा रहेको बताए । यी विद्यालयकको वार्षिक नतिजा निजी विद्यालयको भन्दा कमी हुँदैन ।