काठमाडौं, १ माघ — अमेरिकाका राष्ट्रपति डोनल्ड ट्रम्पले बिहीवार हाइटी, एल साल्भाडोर र केही अफ्रिकी मुलुकलाई शिटहोल (दिसाको खाल्डो) भनी टिप्पणी गरेपछि संसारभरिका पत्रकारमाझ यो कसरी उद्धृत गर्ने होला भनी बहस चल्यो । 

ट्रम्पको टिप्पणीका विषयमा के गर्ने अनि यसलाई सेन्सर गर्ने कि नगर्ने भनी अमेरिकाका पत्रकार नै रनभुल्ल परे । यो अश्लील शब्दावली पत्रिका वा टीभीमा प्रसारण गर्न योग्य थिएन । 

अझ अर्को भाषामा यसलाई कसरी अर्थ्याउने भन्ने समस्या पनि आइलाग्यो । सबै संस्कृतिमा अश्लीलता हुन्छन् तर तिनलाई अनुवाद गर्दा अर्थ आउँदैन । 

सांसदहरूसँग आप्रवासन सुरक्षाका विषयमा कुराकानी गर्ने क्रममा ट्रम्पले केही देशलाई शिटहोल भनेको भनी द वाशिङटन पोस्टले लेखेको थियो ।

एल साल्भाडोरका दैनिक पत्रिकाहरूले यसलाई अगुजेरोस दे मिएर्दा अर्थात् दिसाका प्वाल भनी अनुवाद गरे । 

अरू पत्रिकाका सम्पादकले दिसे मुलुकहरू, फोहोरी देशहरू र सुँगुरको खोरहरू भनी अनुवाद गर्ने सोच बनाएका थिए । 

ट्रम्प राष्ट्रपति भएपछि अनुवादक र व्याख्याताहरूलाई टाउकोदुखाइ हुने गरेको छ । उनले सरल शब्द प्रयोग गर्दा त सजिलै हुन्छ तर ती शब्दहरू वाक्य र अनुच्छेदमा प्रयोग हुँदा मिसमास भएर कुरोको सिलसिला मिलाउनै गाह्रो पर्छ । 

ट्रम्पले निर्वाचन अभियानका बेलामा लीक भएको महिलाका सम्बन्धमा गरेको अश्लील टिप्पणी ‘ग्य्राब देम बाई द पुसी’ अर्थात् ‘महिलाहरूको गुप्तांग समात’ लाई चीनमा अनुवाद गर्न धौधौ प–यो । त्यहाँ पुसीका लागि शब्द नभएपछि उनीहरूले गुप्तांग वा तल्लो अंग भनी अनुवाद गरे । 

शिट र होल बेग्लाबेग्लै शब्दले अर्थ दिने भएपनि तिनलाई जोड्दा चाहिँ अर्थ निकाल्न गाह्रो पर्छ । केही देशमा यो शब्दावली प्रयोग गर्ने कसरी हो भनी अनुवादकहरूलाई गाह्रो प–यो । 

फिनल्यान्डमा यसलाई पेर्स्लापिमात भनी अनुवाद गरियो जसको अर्थ मलद्वार देशहरू भन्ने लाग्छ । 

स्वाहिली भाषामा ट्रम्पको शब्दावलीलाई बोंगो ल्यान्ड भनी अनुवाद गरिन सक्छ । गरीब वा असभ्य ठाउँलाई वर्णन गर्न यो प्रयोग हुन्छ । 

ताइवानमा चाहिँ यसलाई नियाओ बु शेङ दान दे गुओ जिया भनी अनुवाद गरियो जसको अर्थ चरीले अण्डा नपार्ने देश भनी लाग्छ । जापानमा यसलाई बेन्जो नो यो नी कितानाइ कुनी भनी अर्थ लगाइयो, भन्नाले शौचालय जस्ता फोहोरी देशहरू । 

दक्षिण कोरियाका सञ्चारमाध्यमले चाहिँ अंग्रेजी शब्द नै प्रयोग गरे । 

जर्मनीमा ड्रेकस्लोख शब्द प्रयोग भयो जसले फोहोर फाल्ने भाँडोको अर्थ दिन्छ । 

एजेन्सी