काठमाडौं, १ माघ — सामाजिक सञ्जाल फेसबूकका सीईओ मार्क जुकरबर्गले आगामी समयमा फेसबूकको न्युजफीडमा प्रयोगकर्ताले ठूलो परिवर्तन देख्न पाउने बताएका छन् ।

प्रयोगकर्ताहरूले यस प्लेटफर्ममा आफ्ना साथी र नातेदारका स्टोरी र भिडियोलाई सबभन्दा पहिले देखाइनेछ । 

फेसबूकमा प्राथमिकताका आधारमा न्युज पोस्टहरूलाई देखाइएकोमा प्रयोगकर्ताहरू रिसाएका कारण कम्पनीले बेसिक फीचरलाई फेरि ल्याउने फैसला गरेको हो । 

जुकरबर्गका अनुसार, अब प्रयोगकर्ताले साथी र आफन्तको पोस्ट पहिले देख्नेछन् । फेसबूकले अनुसन्धानबाट पत्ता लगाएअनुसार, प्रयोगकर्ताहरू आफ्ना बच्चाका तस्वीरलाई देखेर बढी खुशी हुन्छन् अनि उनीहरूलाई न्युजलिंकहरूको खासै मतलब हुँदैन । 

दुई अर्ब सक्रिय प्रयोगकर्ता फेसबूकमा छन् र मानिसहरूले न्युज पोस्टको बाढीका कारण त्यसमा कम समय बिताइरहेका छन् । यसकारण यसमा परिवर्तन ल्याइँदैछ । 

फेसबूकले आफ्नो व्यापार बढाउने र धेरै पैसा कमाउने उद्देश्यले न्युज पोस्टहरूलाई उच्च प्राथमिकताका साथ देखाउन शुरु गरेको थियो । न्युज बूस्ट गर्न लगाएर उसले थुप्रो पैसा कमाउन सफल भएको थियो । यसबाट फेसबूकले पैसा त कमायो तर फेक न्युजहरूको बाढी नै आयो । 

मानिसहरूबीच शत्रुता चर्काउने काम यसबाट भएको भनी फेसबूकको आलोचना भयो र उसको बदनामी भयो । तर यही कारणले नै बेसिक फीचरतर्फ फर्केको भनी फेसबूकले पुष्टि गरेको छैन । 

फेसबूकमा अब बूस्टहरू कम हुनेछन् । व्यापार, ब्रान्ड र मिडियासँग जोडिएका कन्टेन्टहरू कम देखिनेछन् र प्रयोगकर्ताको व्यक्तिगत क्षणहरूलाई उच्च प्राथमिकता दिइनेछ । 

जुकरबर्गका अनुसार, मिडिया कन्टेन्टलाई कम गरेर पर्सनल कन्टेन्टलाई बढाउँदा मानिसहरूबीच सम्बन्ध प्रगाढ हुन्छ । फेसबूकले प्रयोगकर्ताको मूड सही रहोस् र कम्युनिटी तथा बिजनेसका लागि पनि लाभदायक होस् भन्ने उद्देश्य राखेको छ । 

फेसबूकमा पोस्ट गर्ने अन्लाइन समाचार पोर्टलहरूलाई अब गाह्रो पर्नेछ । लिंक पोस्ट गरेपनि प्रयोगकर्ताकहाँ त्यो खासै पुग्न पाउनेछैन । 

जुकरबर्गको टोलीले प्रयोगकर्ताहरू फेसबूकमा लाइभ गराउन खुबै मन पराउने पत्ता लगाएपछि त्यस्ता भिडियोलाई नै अब प्राथमिकता दिइने भएको छ । फेसबूकले आफ्नो टीभी प्रोग्रामिङमा एक अर्ब डलर लगानी गर्ने र अमेजन तथा नेटफ्लिक्स जस्ता ओरिजिनल शोज पनि मानिससमक्ष पु–याउने योजना बनाएको छ । 

एजेन्सी