काठमाडौं, १ माघ- निर्वाचन आयोगले राष्ट्रियसभा सदस्य निर्वाचन कार्यतालिका प्रभावित हुनसक्ने भन्दै प्रदेश प्रमुखको नियुक्ति तत्काल गर्न पुन: सरकारको ध्यानार्षण गराएको छ । राष्ट्रियसभा निर्वाचनलाई मध्यनजर गर्दै जतिसक्दो छिटो प्रदेश प्रमुख नियुक्त गर्न प्रधानमन्त्री शेरबहादुर देउवाको ध्यानाकर्षण गराएको आयोगका प्रवक्ता नवराज ढकालले जानकारी दिए ।

'प्रदेश प्रमुखको नियुक्ति छिटो हुनुपर्छ भनेर हामीले प्रधानमन्त्रीको ध्यानाकर्षण गराइसकेका छौं,' प्रवक्ता ढकालले लोकान्तरसँग भने, 'राष्ट्रियसभा निर्वाचनका लागि मतदाता नामावली प्रकाशित गर्नुअघि मतदाता तयार हुन् भन्ने हो ।' राष्ट्रियसभा निर्वाचन कार्यतालिकाअनुसार माघ ७ गते मतदाता नामावली प्रकाशित गर्ने कार्यक्रम छ ।

राष्ट्रियसभा सदस्य चुन्नका लागि स्थानीय तहका अध्यक्ष/उपाध्यक्ष र प्रमुख/उपप्रमुखसँगै प्रदेशसभा सदस्यहरुले मतदान गर्नुपर्ने हुन्छ। तर, सरकारले प्रदेश प्रमुख र प्रदेशको अस्थायी मुकाम तोक्न ढिला गर्दा निर्वाचन आयोगले प्रदेशसभामा समानुपातिकतर्फबाट निर्वाचित हुने सदस्यहरुको सूची सार्वजनिक गर्न पाएको छैन। प्रदेशसभा निर्वाचनको सम्पूर्ण परिणाम आएको ७ दिनभित्र प्रदेश प्रमुखसमक्ष नतिजा पेस गर्नुपर्ने कानूनी व्यवस्था छ।

आयोग स्रोतका अनुसार सरकारले छिटो प्रदेश प्रमुख र मुकाम नतोकेको खण्डमा माघ २४ गतेका लागि तय भएको राष्ट्रियसभा निर्वाचन प्रभावित हुने खतरा छ । आयोगले मतदाता नामावली प्रकाशन गर्नुअगावै प्रदेश प्रमुख र मुकामको व्यवस्था नभए निर्वाचन कार्यतालिका प्रभावित हुने चेतावनी सरकारलाई दिएको छ । 

आयोगले यसअघि लिखित रुपमै पनि सरकारको ध्यानाकर्षण गराएको थियो । गत शुक्रबार बसेको आयोगको बैठकले यथाशीघ्र प्रदेश प्रमुखको नियुक्ति गर्न सरकारलाई पुन: आग्रह गर्ने निर्णय गरेको थियो ।

यस्तो थियो आयोगको निर्णय -

निर्वाचन आयोगले कानूनी जटिलतालाई कारण देखाउँदै प्रतिनिधिसभा सदस्य निर्वाचनको अन्तिम परिणामसमेत सार्वजनिक गरेको छैन । आयोगले परिणाम सार्वजनिक गर्न राष्ट्रियसभा निर्वाचन कुरिरहेको अवस्थामा यो निर्वाचन प्रभावित भए नयाँ सरकार गठनमा समेत थप समय लाग्नेछ ।