काठमाडौं, १ माघ- नेकपा (माओवादी केन्द्र)का अध्यक्ष पुष्पकमल दाहाल प्रचण्डले एमाले अध्यक्ष केपी शर्मा ओली र आफूले पार्टी एकताबाट कुनै पनि हालतमा पछाडि नफर्किने संकल्प गरेको बताएका छन् । काठमाडौंको गोकर्णेश्वर नगरपालिकामा आयोजित तारेभीर महोत्सवको सोमबार उद्घाटन गर्दै अध्यक्ष प्रचण्डले नेपाल राष्ट्र र जनताको आकांक्षाअनुसार अघि बढ्ने संकल्प आफूहरुले गरेको बताएका हुन् ।

'नेकपा एमालेका अध्यक्ष कमरेड केपी शर्मा ओलीजी र मैले अब हामी कुनै पनि मूल्यमा पछि नफर्किने र नेपाल राष्ट्र तथा नेपाली जनताको आकांक्षाअनुसार अघि बढ्ने संकल्प गरेका छौं,' प्रचण्डले भने। यसले नयाँ युगको सुरुवात हुने उनको विश्वास छ।

प्रचण्डले एकताको एजेण्डा र आफूहरुको घोषणालाई अनुमोदन गरेको भन्दै मतदातालाई धन्यवादसमेत दिए। 'जसरी हाम्रो घोषणालाई, प्रतिबद्धतालाई विश्वास गरेर, भरोसा गरेर अनुमोदन गर्नुभएको छ, यसका लागि तपाईंहरु दुवै पार्टीको र एकता संयोजन समितिको तर्फबाट धन्यवादको पात्र हुनुहुन्छ,' उनले भने ।

अहिले मुलुक ३ तहको सरकार निर्माणको प्रक्रियामा रहेको भन्दै अध्यक्ष प्रचण्डले ७० वर्षपछि मुलुकले स्थायी सरकार पाउन लागेको दाबी गरे। 'हामी तीन तहको सरकार निर्माणको प्रक्रियामा छौँ । स्थानीय सरकार बनिसकेको छ, प्रदेश र संघीय सरकार पनि बन्दै छ,' अध्यक्ष प्रचण्डले भने, 'यो पटक हामीले ७० वर्षपछि देशलाई एउटा स्थायी सरकार दिँदैछौँ।'

नयाँ सरकारले ५ वर्षसम्म देशलाई विकासको गति दिने उनको जिकिर छ।

हेर्नुहोस् भिडियो-