काठमाडौं, ४ माघ — भूउपग्रहीय तस्वीरहरूसहितका केही मिडिया रिपोर्टमा चीनले विवादित दोक्लम क्षेत्रको उत्तरी भागमा सात हेलिप्याड बनाएको लेखिएको छ । 

त्यहाँ जमीनबाट मार हान्ने क्षेप्यास्त्रहरू, ट्यांकहरू, सशस्त्र वाहन, आर्टिलरी समेत अनेकौं सैन्य उपकरण पनि भेटिएका छन् । चीनले त्यहाँ सडक निर्माण परियोजनालाई अघि बढाउने भएको छ ।

भारतीय सेनाका प्रधानसेनापति विपिन रावतले बुधवार भारत र चीनबीचको सम्बन्ध पूर्ववत् अवस्थामा फर्किसकेको र कुनै गम्भीर समस्या नभएको बताएका छन् । उत्तरी दोक्लममा चिनियाँ सैनिक उपस्थित भएपनि उनीहरूको संख्या ठूलो नभएको उनको भनाइ छ । 

रावतका अनुसार, चिनियाँ सैनिकहरूले अस्थायी कामहरू गरिरहेका छन् । अत्यधिक जाडोका कारण उनीहरूले उपकरण आफूसँग नलगेका हुनसक्छन् । चिनियाँ सैनिक फर्किए भने आफूहरूले उनीहरूको सामना गर्ने रावतले बताए । 

सेनाप्रमुखले दुवै देशमा तनाव कम गर्नका लागि अपनाइएका तरिकाको पनि जानकारी दिए । उनले भने, ‘सीमामा दुवै देशका सैनिकहरूबीच लगातार कुराकानी भइरहेको छ । हामीले व्यक्तिगत भेटघाट शुरू गरिसकेका छौं । धरातलमै पनि कमान्डरहरूबीत कुराकानी भइरहेको छ । दोक्लम विवादअघि दुई देशको सम्बन्ध जस्तो थियो, अहिले त्यस्तै छ ।’

दोक्लममा चीन र भारतका सेना ७३ दिनसम्म आमनेसामने थिए । त्यो गतिरोध सन् २०१७ को २८ अगस्टमा अन्त्य भएको थियो । 

सञ्चारमाध्यमहरूमा आएका खबरअनुसार, उत्तरी दोक्लममा चीनले सैन्य शिविर बनाइरहेको छ । उक्त क्षेत्रमा सहज पहुँचका लागि उसले सडक बनाउने लक्ष्य लिएको छ । 

नयाँ स्याटेलाइट इमेजहरूमा चीनले सैन्य शिविर बनाएको देखिन्छ । यो क्षेत्र १० वर्ग किलोमिटरमा फैलिएको छ । 

एजेन्सी