काठमाडौं ४ माघ– नेकपा एमालेका अध्यक्ष केपी शर्मा ओलीले प्रदेश प्रमुख र अस्थायी राजधानी ताक्ने विषय सरकारको अधिकार भए पनि तोकिएका व्यक्ति र स्थानप्रति आफूहरुको समर्थन नरहेको बताएका छन् । 

थाइल्याण्डको बैंककमा स्वास्थ्य जाँच गराई स्वदेश फर्किने क्रममा बिहीवार त्रिभुवन अन्तराष्ट्रिय विमानस्थलमा पत्रकारहरुसँग कुरागर्दै अध्यक्ष ओलीले प्रदेशको राजधानी तोक्न आफूहरुले सहमति जनाए पनि व्यक्ति र स्थानबारे समर्थन नभएको बताएका हुन् ।

‘हामीले धेरै अगाडिदेखि सहमतिमा गरौँ भनेका थियौँ, अन्तिम समयमा भनेपछि तोक्न सहमति जनाएका हौँ,’ ओलीले भने, ‘तोकौँ भन्ने सहमति दिएका हौँ, कसलाई तोक्ने भन्ने सरकारको विषय हो ।’ ओलीले अहिले तोकिएका प्रदेशको राजधानीको विषयमा सहमति नभएको बताए । 

‘प्रदेशको राजधानी तोकिएको विषयलाई लिएर आन्दोलन भन्दा पनि यसको विविद टुंगाउने विधि छ । प्रदेश सभाले अनुकुलता र आवश्यकता हेरेर राजधानी तोक्छ,’ उनले भने ।

गत पुस २६ गते बैंकक गएका ओली बिहीवार स्वदेश फर्किएका हुन् ।