काठमाडौं,४ माघ– सरकारसँग ११ बुँदे सहमति भएपछि  नेपाल नर्सिङ संघको ९ दिन लामो आन्दोलन स्थगित भएको छ  ।  बिहिबार भएको वार्तामा सरकार र नर्सिङ संघबीच ११ बुँदे समझदारी भएसँगै आन्दोलन स्थगित भएको हो । 

स्वास्थ्य मन्त्रालयका  विशेषज्ञ डाक्टर विनोदमान श्रेष्ठको संयोजकत्वमा स्वास्थ्य मन्त्रालयले बनाएको वार्ता समिति र नेपाल  नर्सिङ संघका पदाधिकारी बीच आठ घण्टा लामो वार्तापछि ११ बुँदे सहमति भएको  संघकी सदस्य दुुर्गा सापकोटाले लोकान्तरलाई बताइन् ।

उनकाअनसार मानव अंग प्रत्यारोपण केन्द्रबाट निकालिएका नर्स त्रजिता जति, सजना द्यौलालाई ७५ प्रतिशत तलब  उपलव्ध गराउने र थप तीन महिनाको लागि करार थप्ने व्यवस्था मिलाउन  मन्त्रालयले निर्देशन दिने सहमति भएको छ । 
यस्तै  सरकारी र निजीमा हुने गरेको पारिश्रमिकमा विभेद हटाउन पहल गर्ने, संघीय तथा प्रदेश मन्त्रालयमा नर्सिङ सेवा महाशाखा स्थापना गर्न मन्त्रालयमार्फत सामान्य प्रशासन मन्त्रालयमा लेखिपठाउने सहमति पनि भएको छ  । 

यसैगरी  दुर्गम क्षेत्रमा काम गर्ने नर्सहरुलाई स्वास्थ्य संस्थाको परिसर नजिकमा सुरक्षित आवासको प्रवन्ध गर्ने पनि सहमति पत्रमा उल्लेख छ । यस्तै  भौगोलिक वर्गीकरणलाई पुनरावलोकन गरी वैज्ञानिक बनाउन र बर्गीकरणको

आधारमा ५० देखि २०० प्रतिशतसम्म हुने गरी कर्मचारीलाई दुर्गम भत्ता उपलब्ध गराउन सिफारिश गर्ने, नर्सहरुको बृद्धिविकास र बढुवामा स्पष्ट मापदण्ड बनाउने, लगायतका सहमति पनि भएका छन् । 
स्वास्थ्य मन्त्रालय र नर्सहरु बीच भइरहेको छलफल सकारात्मक रहेको सापकोटाले बताइन् ।

नेपाल नर्सिङ संघको अगुवाइमा देशभरका नर्सहरुले ९ दिनअघिदेखि ११ बुँदे माग अघि सार्दै विभिन्न आन्दोलनका कार्यक्रमहरु गर्दै आएका थिए ।
मानव अंग प्रत्यारोपण केन्द्रबाट निष्काशन गरिएका नर्सिङ कर्मचारीहरुलाई बिनासर्त पुनर्बहाली गर्नुपर्ने, अधिकारसहितको नर्सिङ सेवा महाशाखा पुनस्र्थापना गर्नुपर्ने, जनतालाई गुणस्तरीय नर्सिङ सेवा दिनका लागि नेपाल सरकारले बनाएको नर्स र बिरामीको अनुपात सबै अस्पतालमा यथाशीघ्र लागू गर्नुपर्ने,सरकारका नर्सहरुलाई उपलब्ध गराइरहेको न्यूनतम तलबभत्ता सरह निजी स्वास्थ्य संस्थामा कार्यरत नर्सलाई पनि उपलब्ध गराइनुपर्ने लगायतका माग राख्दै नर्सहरु आन्दोलित भएका थिए । 

यस्तो छ सहमतिपत्र