काठमाडौं, ५ माघ — न्युजील्यान्ड भ्रमणमा रहेको पाकिस्तानले पाँच एकदिवसीय म्याचको शृंखलाका सबै खेल गुमाएर क्लीन स्वीप पराजय बेहोरेको छ । 

शुक्रवार वेलिङटनमा सम्पन्न पाँचौं म्याचमा न्युजील्यान्ड १५ रनले विजयी भयो । न्युजील्यान्डले २७१ बनाएकोमा पाकिस्तान २५६ रनमै अलआउट भयो ।

टस जितेर ब्याटिङ गरेको न्युजील्यान्डले प्रारम्भिक ब्याट्स्म्यान मार्टिन गुप्तिलको १०० रनको मद्दतले सात विकेट क्षतिमा २७१ रन बनायो । १२६ बलको सामना गर्दै गुप्तिलले १० चौका र एक छक्काको मद्दतले शतक बनाएका हुन् । 

रोस टेलरले ५९, कोलिन मुनरोले ३४ अनि ग्य्रान्डहोमले २९ रनको योगदान गरे ।

पाकिस्तानका लागि रुम्मान रईसले तीन विकेट लिए तर उनले रन पनि धेरै खर्चिए । उनको १० ओभरमा ६७ रन बन्यो । फहीम अशरफले दुई र आमेर यामिनले एक विकेट लिए ।

जवाफमा ब्याटिङ गरेको पाकिस्तान अत्यन्तै खराब शुरूवात ग–यो । जम्मा ५७ रनमा पाँच विकेट गुमाएको पाकिस्तानलाई हरिस सोहेल र शादब खानले सम्हाले । सोहेलले ६३ रन बनाए भने शादबको नाममा ५४ रन रह्यो ।

​यिनीहरूबीच छैठौं विकेटका लागि १०५ रनको साझेदारी बन्यो । 

पुछारका ब्याट्स्म्यानहरूले आक्रामक ब्याटिङ गरेर पाकिस्तानलाई जिताउन कोशिश गरेको भएपनि पूरै टीम एक ओभर बाँकी रहँदै १५ रनको हार बेहोर्न बाध्य भयो । 

न्युजील्यान्डका लागि म्याट हेनरीले घातक बलिङ गर्दै चार विकेट लिए । मिचेल स्यान्टनरले तीन, लोकी फर्गुसनले दुई र ग्य्रान्डहोमले एक विकेट लिए । 

शतक बनाएका गुप्तिल म्यान अफ द म्याच र म्यान अफ द सिरिज छानिए ।