काठमाडौं, ५ माघ — अस्ट्रेलिया भ्रमणमा रहेको इंग्ल्यान्डले शृंखलाको दोस्रो एकदिवसीय म्याचमा चार विकेटको विजय प्राप्त गरेको छ । यससँगै पाँच एकदिवसीय खेलको शृंखलामा इंग्ल्यान्डले २–० को अग्रता लियो ।

ब्रिसबेनमा शुक्रवार सम्पन्न खेलमा टस जितेर ब्याटिङ रोजेको अस्ट्रेलियाले नौ विकेटको क्षतिमा २७० रन बनाएको थियो । इंग्ल्यान्डले ६ विकेटको क्षतिमा ३४ बल बाँकी छँदै चार विकेटको जीत हात पा–यो । सन् १९९९ पछि इंग्ल्यान्डले पहिलोपटक ब्रिसबेनमा जीत हासिल ग–यो ।  

इंग्ल्यान्डलाई विजय दिलाउन जोनी बेयरस्टोको ६०, एलेक्स हेल्सको ५७, जो रूटको नटआउट ४६ र जोश बट्लरको ४२ रनको योगदान रह्यो । 

दुई रनमै पहिलो विकेट गुमाएको इंग्ल्यान्डका लागि हेल्स र बेयरस्टोले ११७ रनको साझेदारी गरेर स्थिरता दिए । त्यसपछि अन्य ब्याट्स्म्यानले रन थप्दै गए । 

अस्ट्रेलियाका लागि मिचेल स्टार्कले चार र झाई रिचर्डसनले दुई विकेट लिए । 

यसअघि अस्ट्रेलियाले प्रारम्भिक ब्याट्स्म्यान आरोन फिन्चको शतकको मद्दतले २७० रन बनाएको थियो । फिन्चले ११४ बलको सामना गर्दै नौ चौका र एक छक्काको सहायताले १०६ रन बनाए । मिचेल मार्शको ३६, डेभिड वार्नरको ३५ र एलेक्स केरीको २७ रन अन्य उल्लेख्य स्कोर रहे । 

इंग्ल्यान्डका लागि अब्दुल रशिद तथा जो रूटले दुई दुई अनि क्रिस वोक्स, लियाम प्लंकेट र मोईन अलीले एक एक विकेट लिए ।

तेस्रो एकदिवसीय आइतवार सिड्नीमा खेलिनेछ ।