पार्टी एकताका लागि नीति र नेतृत्व एक साताभित्रै टुंगिन्छ : खनाल

माघ ६, २०७४

काठमाडौं, ६ माघ- नेकपा एमालेका वरिष्ठ नेता एवम् पूर्वप्रधानमन्त्री झलनाथ खनालले एमाले र माओवादी केन्द्रबीच एकताका लागि एक हप्ताभित्रै नीति र नेतृत्वमा सहमति जुट्ने खुलासा गरेका छन्।

रिपोर्टर्स क्लब नेपालले शनिबार आयोजना गरेको साक्षात्कारमा बोल्दै वरिष्ठ नेता खनालले यस्तो खुलासा गरेका हुन् ।


ADVERTISEMENT

‘कार्यदलले आवश्यक गृहकार्य गरेर नीति र नेतृत्वको विषयमा टुँगोमा पुग्छौं,' उनले भने, ‘अब बस्ने एकता संयोजन समितिको बैठकले एकताबारे ठोस निर्णय लिन्छ, नेतृत्व र नीतिबारे एक हप्ताभित्रै सहमतिमा पुग्छौँ ।'

पार्टी एकतालाई छिट्टै निष्कर्षमा पुर्‍याउन आवश्क परे वैचारिक र संगठनात्मक गरी दुईवटा कार्यदल बनाइने उनको भनाइ छ । नयाँ सरकार गठनअघि नै पार्टी एकता हुनसक्ने नेता खनालले बताए।

भावी प्रधानमन्त्री एमाले अध्यक्ष केपी शर्मा ओली बन्ने लगभग पक्का रहेको उनको भनाइ छ ।

'अहिलेलाई केपी ओलीजी प्रधानमन्त्री बन्ने सम्भावना ९९ प्रतिशत छ, को अध्यक्ष बन्छ भन्ने विष्यामा सल्लाह गर्न बाँकी छ,’ उनले भने ।

साथै उनले प्रदेशको अस्थायी मुकामको विषयलाई लिएर अहिले विवाद, बखेडा झिकेर आन्दोलन गर्नु उपयुक्त नहुने समेत बताए । 'अस्थायी राजधानी स्थायी रहँदैनन् । प्रदेशले यो बारेमा आफैँले निर्णय गर्नेछ, यद्यपि प्रदेशको राजधानी तोक्नेबारेमा सरकारले भने राम्रो ढंगले बुद्धि पुर्‍याएन ।' 

उनले अघि भने, 'प्रदेश प्रमुख वर्तमान सरकारले नै नियुक्ति गर्ने हो, नियुक्ति गरिएको विषयलाई हामीले कुनै आश्चर्य र अनौठो ढंगबाट लिएका छैनौँ, अब प्रदेशको प्रक्रिया अघि बढ्छ, उहाँहरुको काम र क्रियाकलापलाई हेर्दै प्रदेश प्रमुखहरु पदमा कति रहन्छन् वा रहन्नन् भन्ने कुरा आगामी सरकारले निर्णय गर्ने ।'

खनालले राष्ट्रपति बन्ने आफ्नो चाहना उजागरसमेत गरे । 'लामो संघर्षमय जीवन भएको, लोकतान्त्रिक आन्दोलनमा लामो योगदान भएको र राष्ट्रको महत्वपूर्ण नेतृत्व पंक्तिमा बसेर काम गरेको व्यक्तिलाई राष्ट्रपति जस्तो गरिमामय पदमा पठायो भने राष्ट्रकै निम्ति महत्वपूर्ण हुनेछ,' नेता खनालले भने, 'पार्टीले दिने जिम्मेवारीलाई दृढतापूर्वक पालना गर्छु, जे जिम्मेवारी दिए पनि पालना गर्न सक्छु, जिम्मेवारी मबाट शिरोधार्य हुनेछ ।'

माघ ६, २०७४ मा प्रकाशित

प्रतिक्रिया दिनुहोस