हराएकी श्रीमतीलाई खोज्न साइकलमा ६०० किमी यात्रा गरे यी मानिसले

फागुन २, २०७४

काठमाडौं, २ फागुन — भारतको झारखण्डका मनोहर नायकले हराएकी पत्नीको खोजमा जीवन नै दाउमा राखेका छन् । उनले श्रीमती खोज्नका लागि लगातार २४ दिन साइकल चलाए । 

चौबीस दिनसम्म एकपछि अर्को गाउँ घुम्दै ६०० किलोमिटर साइकल चलाएपछि बल्ल उनकी हराएकी पत्नी फेला परिन् । 

झारखण्डको बालिगोडा गाउँका मनोहरकी पत्नी माघे संक्रान्तिको उपलक्ष्यमा माइत गएकी थिइन् । उनी त्यहीँबाट हराइन् । 

मनोहरले भने, ‘उनी दुई दिनसम्म पनि नफर्किंदा मैले प्रहरीसमक्ष उजुरी गरें ।’ प्रहरीले कुनै सहायता नगरेपछि उनी आफैं पत्नीको खोजमा हिँडे । 

मनोहर भन्छन्, ‘मैले पुरानो साइकल बनाएर पत्नीलाई खोजें । कति समयमा उनी भेटिएलिन् र कहाँसम्म जानुपर्ने हो मलाई थाहा थिएन । मैले जसरी भएपनि श्रीमती खोज्नुपर्ने चाहिँ थियो ।’

मनोहरकी पत्नी अनिता अन्ततोगत्वा कोलकाताको खडगपुरमा भेटिइन् । मनोहरले स्थानीय पत्रिकाहरूमा पत्नी हराइरहेको रिपोर्ट फोटोसहित छपाएपछि मानिसहरूले प्रहरीलाई खबर गरेका थिए । 

कोलकाता प्रहरीले जमशेदपुर प्रहरीलाई खबर गरेपछि प्रहरीले तत्कालै मनोहरलाई बोलायो र दुवैजनाको आधार कार्डसहित जमशेदपुर आउन लगायो । फेब्रुअरी १० मा मनोहरले प्रहरी थानामा पत्नी भेटे अनि भोलिपल्ट उनीहरू घर
फर्किए । 

एजेन्सी
 


ADVERTISEMENT

फागुन २, २०७४ मा प्रकाशित

प्रतिक्रिया दिनुहोस