प्रमुख समाचार : राष्ट्रका नाममा सम्बोधनपछि देउवाको राजीनामा, ओली र प्रचण्ड आलोपालो प्रधानमन्त्री

काठमाडौं, ३ फागुन– एकता प्रक्रिया खाकालाई निष्कर्षमा पुर्‍याउन बुधबार बसेको नेकपा (एमाले) र नेकपा (माओवादी केन्द्र) पार्टी एकता संयोजन समितिको बैठकले नयाँ प्रधानमन्त्री चयनका लागि तत्काल राष्ट्रपतिसमक्ष दाबी प्रस्तुत गर्ने सहमति गरेको छ ।
एकता प्रक्रियाको ठोस खाकामा बुँदागत सहमति आउने अपेक्षा गरिएको सो बैठकले त्यसबारेमा बिहीबार निर्णय गर्ने समझदारी गरेको छ । 
एमाले र माओवादीबीच ओली र प्रचण्ड आलोपालो प्रधानमन्त्री हुने सहमति पनि जुटेको बताइएको छ । तथापि आलोपालो सरकार चलाउने माओवादी प्रस्तावमा एमालेभित्र केही असन्तुष्टि छ ।
तत्काल सरकार बनाएर बहुदलीय प्रतिस्पर्धाका आधारमा मुलुकलाई आर्थिक सामाजिक रुपान्तरणका काममा मुलुकलाई अघि बढाउन ढिला भइसकेकाले नयाँ सरकार चाँडै बन्ने माओवादी नेता नारायणकाजी श्रेष्ठले बताए । 
संयोजन समितिका सदस्य एमाले वरिष्ठ नेता झलनाथ खनालले छलफल जारी रहेकाले निष्कर्ष बाहिर ल्याउन नसकिएको बताए । 
बैठकमा पार्टी एकताका लागि संगठनात्मक र वैचारिकसम्बन्धी दुई अलगअलग कार्यदल बनाउने सैद्धान्तिक सहमति भएको समितिका सदस्य एमाले उपाध्यक्ष वामदेव गौतमले जानकारी दिए । उनले कार्यदलका सदस्यहरुका नाम बिहीबार तय हुने बताए । 


प्रधानमन्त्रीले सम्बोधन गर्ने– बुधबार बस्ने भनिएको मन्त्रिपरिषद्को बैठक बिहीबार बिहान ९ बजे बस्ने भएको छ । बालुवाटारस्थित प्रधानमन्त्री निवासमा साँझ बस्ने भनिएको बैठक बस्न नसकेपछि अर्को दिन बिहान ९ बजे बस्ने तय भएको प्रधानमन्त्री शेरबहादुर देउवाका प्रेस संयोजक गोविन्द परियारले जानकारी दिए । 
बिहीबार बिहान मन्त्रिपरिषद् बैठकपछि प्रधानमन्त्री देउवाले देशवासीका नाममा  सम्बोधन गर्ने कार्यक्रम तय भएको उनले बताए । 

आयोगले प्रतिवेदन बुझायो– निर्वाचन आयोगले राष्ट्रपति विद्यादेवी भण्डारीसमक्ष गत मंसिर १० र २१ गते सम्पन्न प्रतिनिधिसभाको प्रत्यक्ष र समानुपातिक निर्वाचनको अन्तिम नतिजासहितको प्रतिवेदन बुझाएको छ । शीलत निवासस्थित राष्ट्रपति कार्यालयमा बुधबार साँझ अबेर प्रमुख निर्वाचन आयुक्तसहित आयोगका पदाधिकारीको टोलीले राष्ट्रपति भण्डारीसमक्ष प्रत्यक्षतर्फ १६५ र समानुपातिकतर्फ ११० विजयी उम्मेदवारको नामसहितको प्रतिवेदन बुझाएको हो । 
प्रतिवेदन ग्रहण गर्दै राष्ट्रपति भण्डारीले निर्वाचन स्वतन्त्र, स्वच्छ र शान्तिपूर्ण वातावरणमा सम्पन्न गरेकामा आयोगका पदाधिकारीलाई धन्यवाद ज्ञापन गर्दै बधाई दिइन् । राष्ट्रपति र उपराष्ट्रपतिको निर्वाचन पनि सफलताका साथ सम्पन्न गराउने जिम्मेवारीलाई पूरा गर्न राष्ट्रपतिबाट निर्देशन भएको प्रमुख निर्वाचन आयुक्त डा अयोधीप्रसाद यादवले बताए । 

एमालेको निर्णय– नेकपा एमालेले अध्यक्ष केपी शर्मा ओलीलाई प्रधानमन्त्रीको उम्मेदवार बनाउने औपचारिक निर्णय गरेको छ । ललितपुरको मानभवनमा बसेको स्थायी कमिटीको आकस्मिक बैठकले ओलीलाई प्रधानमन्त्रीको रुपमा अघि सार्ने निर्णय गरेको हो । 
बैठकमा माओवादी केन्द्रसँग पार्टी एकताको विषयमा भएका सहमतिबारे ओलीले स्थायी समितिका सदस्यहरुलाई जानकारी गराए । सदस्यहरुले माओवादीसँग भएको भनिएको सहमतिमा सामान्य हेरफेर गर्न सुझाव दिएका छन् । 

माओवादी बैठक– नेकपा माओवादी केन्द्रको हेडक्वार्टर बैठकले पार्टी एकतासम्बन्धी समझदारीलाई लिखित रुपमा टुंग्याउने जिम्मा पार्टी अध्यक्ष पुष्पकमल दाहाल प्रचण्डलाई दिएको छ । अध्यक्ष  प्रचण्डले एमाले अध्यक्ष केपी शर्मा ओलीसँग मौखिक सहमति भएको सुनाएपछि बैठकले लिखित समझदारी गर्ने जिम्मा पनि उनैलाई दिएको बैठकमा सहभागी नेता नारायणकाजी श्रेष्ठले जानकारी दिए । प्रचण्ड निवास खुमलटारमा बसेको बैठकमा एमालेसँग दुई अध्यक्ष रहने र आलोपालो सरकारको नेतृत्व गर्नेगरी सहमति भएको ब्रिफिङ प्रचण्डले गरेका थिए । 

प्रदेश मुख्यमन्त्री– प्रदेश नम्बर १, २ र ५ को मुख्यमन्त्री चयन गरिएको छ । १ मा शेरधन राई नियुक्त भएका छन् । मुख्यमन्त्री राईले बिहीबार सपथ लिने भएका छन् ।
प्रदेश नम्बर २ को मुख्यमन्त्रीमा संघीय समाजवादी फोरम नेपालका लालबाबु राउत नियुक्त भएका छन् । राउतले पनि बिहीबार नै शपथ लिने कार्यक्रम छ । 
त्यस्तै, प्रदेश ५ को मुख्यमन्त्रीमा शंकर पोखरेल नियुक्त भएका छन् । नवनियुक्त मुख्यमन्त्री पोखरेलले बिहीबार सपथ लिने कार्यक्रम छ  । राई र एमालेका तर्फबाट मुख्यमन्त्री बनेका हुन् । 
प्रदेश नम्बर ७ मा बिहीबार मुख्यमन्त्री चयन हुने भएको छ । प्रदेशसभा ५ को सभामुखमा नेकपा माओवादी केन्द्रका पूर्णबहादुदर घर्ती निर्विरोध चयन भएका छन् । 

सिलवालविरुद्ध किर्ते मुद्दा– नेकपा एमालेका सांसद एवं पूर्व प्रहरी नायव महानिरीक्षक नवराज सिलवालविरुद्ध सरकारी कागजात किर्ते मुद्दा दर्ता भएको छ । महानगरीय प्रहरी परिसर काठमाडौंले बुधबार जिल्ला सरकारी वकिल कार्यालयमा मुद्दा दर्ता गरेको हो । परिसरका प्रमुख प्रहरी वरिष्ठ उपरीक्षक विश्वराज पोखरेलले सिलवालविरुद्ध मुद्दा दर्ता गरिएको जानकारी दिए ।

विषादीको प्रयोग बढ्दो– कृषिमा व्यवसायीकरणसँगै तरकारीमा विषादीको प्रयोग वर्षेनी बढ्न थालेको छ । गतवर्ष करीब ६९ करोड रुपैयाँ बराबरको ५ सय ७५ मेट्रिक टन विषादी नेपाल भित्रिएको कृषि विभाग अन्तर्गतको बाली संरक्षण निर्देशनालयले जनाएको छ । 
२०७२ मा ४ सय ५० मेट्रिक टन विषादी आयात भएको थियो । यसरी भित्रिएका विषादीमध्ये ८० प्रतिशत तरकारीमा मात्रै प्रयोग हुने गरेको निर्देशनालयका कार्यक्रम निर्देशक अच्युतप्रसाद ढकालले बताए । नेपालमा प्रति हेक्टर औसतमा ३ सय ९६ ग्राम विषादी प्रयोग गरिँदै आएको निर्देशनालयले जनाएको छ । 


खेल खबर– नामिबियामा भइरहेको आइसिसी विश्व क्रिकेट लिग डिभिजन दुईको अन्तिम लिग खेलमा नेपालले क्यानडालाई हराएको छ । नेपालले क्यानडाविरुद्ध एक विकेटको रोमाञ्चक जित निकालेको हो । 
क्यानडाले नेपाललाई दिएको १९५ रनको चुनौती ९ विकेट खर्चँदै अन्तिम बलमा पुरा गर्यो । जीतसँगै  नेपालले डिभिजन एकमा स्थान पक्का गर्दै  वान डे विश्वकप छनोट खेल्न पाउने भएको छ । नेपालको जीतमा करण केसीले उत्कृष्ट प्रदर्शन गरे । उनले नटआउट ४२ रनको योगदान दिए । 
यसअघि टस हारेर पहिले ब्याटिङको निम्तो पाएको क्यानडाले ५० ओभर पूरै खेल्दै ८ विकेटको क्षतिमा १९४ रनको योगफल बनायो । 

फागुन ३, २०७४ मा प्रकाशित

प्रतिक्रिया दिनुहोस