काठमाडौं, ३ फागुन-  सरकारले पूर्वराष्ट्रपति डा. रामवरण यादवका लागि ४० लाखमा अर्को नयाँ गाडी किन्ने गृहकार्य अघि बढाएको छ। राष्ट्रपति कार्यालयले पूर्वराष्ट्रपति यादवलाई एउटा नयाँ गाडी यसअघि नै उपलब्ध गराएको थियो। तर, उनलाई पुनः अर्को गाडी आवश्यक परेको भन्दै गृह मन्त्रालयले ४० लाखमा स्कोरपियो गाडी खरिद प्रक्रिया अघि बढाएको हो। अब पूर्वराष्ट्रपति यादवले दुईवटा गाडी प्रयोग गर्ने भएका छन्, अन्नपूर्ण पोस्टमा खबर छ ।

गृह मन्त्रालय सवारी शाखाका उपसचिव यदुनाथ पौडेलले सरकारले पूर्वराष्ट्रपति यादवलाई थप अर्को एक गाडी दिने निर्णय गरेकाले उनका लागि गाडी खरिद प्रक्रिया अगाडि बढाइएको जानकारी दिए।

पौडेलका अनुसार पूर्वराष्ट्रपतिका लागि थप गाडी किन्न अर्थ मन्त्रालयले ४० लाख रुपैयाँ गृह मन्त्रालयलाई निकासा गरिसकेको छ र रकम प्राप्त भई खरिद प्रक्रिया सुरु भइसकेको छ। सरकारले केही समयअघि मात्रै पूर्वराष्ट्रपति यादवको घर भाडा वृद्धि गर्ने निर्णय गरेको थियो। घरभाडाबापत बढीमा दुई लाखसम्म दिन सकिने निर्णय सरकारले गरेको थियो तर पूर्वराष्ट्रपति यादवलाई घर भाडाबापत ६० हजार रुपैयाँ दिने गरिएको छ।

सरकारले पूर्वराष्ट्रपति यादवलाई मासिक ५० हजार भत्ता दिँदै आएको छ भने सवारीसाधन मर्मत सम्भारबापत मासिक २५ हजार दिँदै आएको छ। यसैगरी, उनलाई मन्त्रीसरह इन्धन सुविधा दिने गरिएको छ भने निजी सचिवालयमा उपसचिवस्तरको एक कर्मचारी र कार्यालय सहयोगी राख्दै उनीहरूलाई तलब खुवाउँदै आएको छ। यसैगरी, यादवलाई पत्रपत्रिकाबापत मासिक ३ हजार दिइने गरेको छ भने खानेपानी, टेलिफोन, इन्टरनेट र बिजुलीको पैसा बिलअनुसार सरकारले नै भुक्तानी दिने गरेको छ। कार्यालयका लागि एउटा मोटरसाइकल पनि दिइने भएको छ।