काठमाडौं, ३ फागुन — अमेरिकामा यूनाइटेड एयरलाइन्सको एक विमान उडानकै क्रममा दुर्घटना हुनबाट जोगिएको छ । सान फ्रान्सिस्कोबाट होनोलुलु गइरहेको थियो । 

एक घन्टा उडेपछि विमानको इन्जिन कभर हावामा उडेको थियो । पाइलटले दिमाग चलाएर प्लेनलाई जसोतसो होनोलुलु पु–याए । त्यस क्रममा कुनै हानि भएन । यात्रुहरू चाहिँ बेस्सरी डराए । 

यूनाइटेड एयरलाइन्सको फ्लाइट ११७५ होनोलुुलुमा ओर्लनुअघि प्रशान्त महासागरमाथि उडिरहँदा विमानको इन्जिन कभर हावामा उडेको थियो । 

यो कभर प्लेनमा ठोक्किएको भए अनर्थ हुन्थ्यो । 

विमानमा ३७३ यात्रु थिए । 

पाइलटले घटनाको जानकारी होनोलुलु विमानस्थललाई दिए । विमानको आकस्मिक अवतरण गराइयो । त्यसक्रममा फायर ब्रिगेड र एम्बुलेन्स पनि रनवेनजिक उपस्थित थिए । 

यूनाइटेड एयरलाइन्सका प्रवक्ता चार्ल्स होबार्टले बताए, ‘पाइलटले बुद्धिमत्तापूर्वक विमानलाई डेनियल के इनोये अन्तर्राष्ट्रिय विमानस्थलमा अवतरण गराए । यात्रुलाई सामान्य तरिकाले विमानबाट ओरालियो र गेटसम्म लगियो ।’

यात्रुहरूले ट्वीटमार्फत आफ्नो अनुभव शेयर गरेका छन् । 

एजेन्सी