काठमाडौं, ५ फागुन– बिहीबार राष्ट्रपति कार्यलयमा केपी शर्मा ओलीले देशको ४१ औं प्रधानमन्त्रीको रुपमा शपथ ग्रहण गर्ने कार्यक्रम थियो । 

ओलीको शपथ समारोहमा भाग लिन  थुपै्र नेताहरु राष्ट्रपति कार्यालय शीतलनिवास पुगेका थिए । एमाले नेतृ एवं पूर्व समानुपातिक सांसद थममाया थापामगर पनि शपथ ग्रहण समारोहमा पुगेकी थिइन् । 

राष्ट्रपति कार्यलयमा प्रधानमन्त्री ओलीको शपथ कार्यक्रम अघि मन्त्रीहरुको नाम भने सार्वजनिक भएको थिएन । केपी ओलीले मन्त्रिमण्डल विस्तार गर्ने हल्ला चलेपनि कसकलाई मन्त्री बनाउने भन्ने सार्वजनिक भएको थिएन । त्यति नै बेला थापाले आफूलाई महिला, बालबालिका तथा समाजकल्याण मन्त्रालयको जिम्मेवारी दिन लागेको जानकारी पाइन् । 

शपथ ग्रहण हुनुभन्दा पँच मिनेट आगाडि मात्र आफू मन्त्री बन्न लागेको जानकारी पाएको उनले बताइन् । 

‘उतिखेरै मलाई मन्त्रीको जिम्मेवारी दिइने कुरा भयो र मन्त्री हुने पक्का भएको ५ मिनेटमै शपथ पनि खाए’ उनले लोकान्तरसँग भनिन्, ‘मैले पहिलो पटक सरकारको नेतृत्व तहमा पुग्ने मौका पाएको छु । मेरो लागि र महिला आन्दोलनको लागि पनि गौरवको विषय हो ।’

नवनियुक्त महिला,बालबालिका तथा समाजकल्याण मन्त्री थममाया थापामगरले आफूले परिणाममुखी कार्य गर्ने बताएकी छन् । देश संघिय प्रणालीमा गएपछि नयाँ सरकार गठन भएको भन्दै मन्त्री थापमगरले आफूले संविधानमा उल्लेखित विषयहरुलाई जनताको भावना,संविधानको मर्म अनुरुप नीति तथा कानुन बनाउने कार्य गर्ने बताएकी हुन् ।

उनले लोकान्तरसँगको कुराकानीमा भनिन्,‘ यो सरकार कम्तिमा पनि पाँच वर्षको हो । हामीले गरेका कार्यहरु परिणाममुखी बनाउन पर्ने हुन्छ । हिजोको सरकार अस्थिर भएकोले पनि कतिपय कानूनहरु कार्यन्वयन नभएको देखिन्छ । अब हामीले परिणामुखी काम गर्नेछौं ।’

आफ्नो संर्घषपूर्ण राजनितीक यात्राबाट संविधानमा महिलाको अधिकार लेखिएको भन्दै उनले त्यसलाई कार्यन्वयन गर्ने जिम्मेवारी आफैमा आएकोमा खुसी व्यक्त गरिन्  । मन्त्री थापामगरले आफूले संविधानमा भएका महिलाका हक अधिकारलाई कायन्वयन गराएर महिलाहरुलाई अधिकार प्राप्तीको अनुभूत गराउने प्रतिवद्धता समेत जनाईन् ।

‘मैले यसअघि गरेका कार्यहरुबाट महिलाहरुले केही राहत अनुभव गरेका छन् भन्ने कुरामा म विश्वस्त छु । तर अझै पनि पूर्ण रुपमा सन्तुष्ट हुन सकेकेको छैन । राजनीतिक रुपले आन्दोलन नै गर्नुपर्ने अवस्था त छैन तर नीति निर्माण बनाउने,समाजमा चेतना जगाउने कार्यहरु बाकी छन् ।’ उनले भनिन्, ‘आगामी दिनमा महिलाअधिकारको लािग परिणाममुखी कार्य गर्नेछु ।’

महिला बालबालिकाको क्षेत्रमा मा परिणाममुखी कार्य गर्न भने चुनौतीपूर्ण रहेको उनको ठम्याई छ । 

‘हाम्रो देशमा राजनितीक परिवर्तन त भएको छ तर सामाजिक परिवर्तन अझै भएको छैन । अहिले पनि हाम्रो समाजले महिलालाई दोस्रो दर्जाको रुपमा हेर्ने, महिलाहरु हिंसाको सिकार हुनुपर्ने, कुरिति र कुसंकारको कारण महिला पीडित हुनुपर्ने अवस्था छ ।’ उनले भनिन्,‘  महिलाहरुप्रतिको सामन्ति सोच अझै हटेको छैन । त्यसलाई परिवर्तन गर्न किनै समय लाग्छ, त्यसलाई अन्त्य गराउनु मेरो लागि प्रमुख चुनौतीको विषय छ ।’

महिलाहरु प्रतिको नकारात्कम सोचलाई परिवर्तन गराउन लागि पर्ने उनको भनाइ छ ।

ओली नेतृत्वमा गठित सरकारमा महिला बालबालिका तथा समाजकल्याण मन्त्रालयको जिम्मा पाएकी पहिलो महिला मन्त्री थापामगरले अन्य मन्त्रालयमा पनि महिला मन्त्री आउन सक्ने बताईन् ।  उनले भनिन्,‘ अन्य मन्त्रालयमा मन्त्री बाँडफाडको कार्य बाकी नै छ अन्य मन्त्रालयमा पनि महिला मन्त्री आउँने सम्भावना छ ।’