काठमाडौं, ५ फागुन– पटक–पटक मन्त्री भएको 'रेकर्ड' बनाइसकेका नेता प्रेमबहादुर सिंह यसपटक सांसद समेत बन्न नपाएपछि आक्रोशित बनेका छन् । 

यसअघि समानुपातिक निर्वाचन प्रणालीबाट सांसद हुँदै हरेक सरकारमा मन्त्री बन्ने गरेका सिंह यसपटक चुनाव अगाडि नै माओवादीसँग 'कार्यगत एकता' गरेका थिए । 

माओवादीले उनलाई समानुपातिक निर्वाचन प्रणालीअन्तर्गत बन्द सूचीमा पिछडिएको क्षेत्रबाट राखेको थियो । 

तर निर्वाचन आयोगले सार्वजनिक गरेको अन्तिम नामावलीमा उनको नाम समावेश भएन । 

सिंहले आफूलाई षड्यन्त्रपूर्वक सांसद बन्नबाट रोकिएको बताएका छन् । पिछडिएको क्षेत्रबाट प्रतिनिधित्व गर्न पाउने आफ्नो संवैधानिक हक रहेको बताउँदै सिंहले भनेका छन्, ‘यो घटना म शारीरिक रुपले गम्भिर बिरामी भएको मौका छोपी पिछडिएको क्षेत्रको प्रतिनिधित्व गर्न पाउने मेरो संवैधानिक हक हनन गर्न गरिएको प्रायोजित एवं सुनियोजित षड्यन्त्र हो ।’

सिंहले आफूलाई समानुपातिकतर्फको अन्तिम नामावलीमा समावेश नगरिएको घटनाको उचित तरिकाले प्रतिवाद गर्ने पनि बताएका छन् । ‘जहानिया निरंकुश राणा शासनको बेलामा पनि न्यायको लागि सिंहदरवार अगाडी ‘राँको’ बाल्ने कर्णालीबासीको गौरवपूर्ण इतिहासको जगमा उभिएर म हमेशा यसको उचित प्रतिवाद  गरिरहने छु,’ सिंहले भनेका छन् ।