काठमाडौं ११ फागुन– नेकपा एमालेसँगको पार्टी एकता प्रक्रियाप्रति असहमति जनाउँदै आएका माओवादी केन्द्रका नेता गोपाल किरातीले पुष्पकमल दाहाल प्रचण्डलाई माओवादी केन्द्रबाट कारवाही गरिएको दाबी गरेका छन् । 

किरातीले शुक्रवार एक विज्ञप्ति प्रकाशित गरी प्रचण्डलाई ‘एमालेकरण भइसकेको दाहाल एण्ड कम्पनी’को संज्ञा दिँदै प्रचण्ड माओवादी केन्द्रमा नरहेको बताएका छन् । उनले आफूलाई माओवादी केन्द्रको संयोजक भनेका छन् ।

‘दक्षिणन्थी काण्डको भण्डाफोर गर्दै नेकपा (माओवादी केन्द्र) पुनर्गगठनको आव्हान’ गरिएको क्रान्तिकारी निर्णयलाई अभियोग ठानेर दाहाल एण्ड कम्पनीले हामीलाई ‘कथित कार्वाही’ गरेकोमा त्यस कम्पनिलाई धन्यवाद नै दिनुपर्छ,’ किरातीले भनेका छन्, ‘माओवादी केन्द्र पुनर्गगठन गर्नुपर्ने कारणबारे एक पटक पनि सुनुवाईको मौका नदिइकन कथित कार्वाही दाहाल कम्पनिकै विनाशको वर्खिलाप समेत हो ।’

माओवादी केन्द्रले किराती लगायत तीन नेतालाई पार्टीबाट निश्कासन गरिसकेको छ । ‘एमालेकरण भइसकेको दाहाल एण्ड कम्पनी माओवादी केन्द्रमा नरहेको स्पष्ट गर्दै त्यस कम्पनिको प्रतिक्रान्तिकारी हर्कत विरुद्ध विरोधको झण्डा उठाउन पार्टी, वाईसीएल, जबस र मोर्चा संगठनका इमान्दार कमरेडहरुलाई जोडदार आव्हान गर्दछु’ किरातीले भनेका छन् ।