काठमाडौं, १३ फागुन — चीनको सत्तारूढ कम्युनिस्ट पार्टीले संविधानमा रहेको राष्ट्रपतिलाई दुईवटा पाँचवर्षे कार्यकालको व्यवस्था हटाउने प्रस्ताव राखेको छ । 

यसो भएमा वर्तमान राष्ट्रपति सी चिनफिङले तेस्रो कार्यकाल पनि चलाउन पाउनेछन् । 

सन् २०२३ पछि पनि राष्ट्रपति कार्यकाल बढाउनका लागि सीले प्रयास गर्ने व्यापक अनुमान गरिएको थियो । 

गत वर्ष भएको महाधिवेशनले उनलाई माओत्से तुङपछिका सर्वाधिक शक्तिशाली नेताको हैसियत दिलाएको थियो । 

उनको विचारधारालाई पार्टीको विधानमा पनि राखिएको थियो अनि परम्परालाई तोड्दै उनको उत्तराधिकारीको खुलासा पनि गरिएको थिएन । 

यो घोषणा सरकारी समाचार संस्था सिन्ह्वामा आइतवार प्रकाशित गरिएको हो । 

संस्थाले विस्तृत विवरण नदिएपनि पूर्ण प्रस्ताव छिट्टै सार्वजनिक गरिनेछ । 

नेसनल पिपुल्स कंग्रेसको वार्षिक पूर्ण सत्रमा यो प्रस्ताव सांसदहरूसमक्ष पेश गरिनेछ । उक्त सत्र फागुन २१ गते शुरू हुनेछ ।

बीबीसीबाट