काठमाडौं, १३ फागुन — छयालीसजना दक्षिण कोरियाली नाविकहरूलाई हत्या गरेको आरोप लागेका एक उत्तर कोरियाली जनरल दक्षिण कोरियाको प्योङचाङमा भइरहेको शीतकालीन ओलम्पिकको समापन समारोहमा भाग लिन आइतवार आइपुगेका छन् । 

जनरल किम योङ–चोलले दक्षिणका राष्ट्रपति मून जे–इनलाई भेटेका थिए । पीडितहरूका परिवार र दक्षिण कोरियाका कन्जर्भेटिभ सांसदहरूले सीमामा उनको प्रवेशमा रोक लगाउने प्रयास गरेका थिए । 

दुई कोरियाबीचको न्यानोपनालाई दक्षिण कोरिया र अमेरिकाबीच फाटो जन्माउने उत्तरको प्रयासका रूपमा हेरिँदैछ । 

अमेरिकाका राष्ट्रपति डोनल्ड ट्रम्पकी छोरी इभान्काले समारोहमा भाग लिइरहेकी छन् । 

अमेरिकी अधिकारीहरूले उत्तर कोरियाका प्रतिनिधिहरूसँग भेटघाटको सम्भावनालाई नकारेका छन् । 

शुक्रवार वाशिङटनले उत्तरमाथि थप प्रतिबन्धको घोषणा गरेको छ । 

उत्तरले यो प्रतिबन्धप्रति कडा प्रतिक्रिया जनाउँदै यो युद्धजन्य काम भएको बताएको छ । 

उत्तर कोरियाको विदेश मन्त्रालयले दुई कोरियाहरूले ओलम्पिकका बेलामा सहकार्य गरेकोलाई प्रशंसा ग–यो तर अमेरिकाले ओलम्पिक सकिनै लाग्दा ‘विशाल नयाँ प्रतिबन्ध लगाएर कोरियाली प्रायद्वीपमा युद्धको खतरा निम्त्याएको’
बतायो । 

कोरियाली प्रायद्वीप सन् १९५०–५३ मा भएको युद्धदेखि विभाजित छ र दुई देशले कहिले पनि शान्ति सम्झौतामा हस्ताक्षर गरेका छैनन् ।

बीबीसीबाट