पाकिस्तानका प्रधानमन्त्री शाहिद खाकन अब्बासी नेपालको संक्षिप्त भ्रमण हिजो शुरु भै आज सकिएको छ । मूलत: नेपालका नयाँ प्रधानमन्त्री खड्गप्रसाद (केपी) शर्मा ओलीलाई प्रत्यक्ष भेटेर बधाई दिने उद्देश्य रहेको जानकारी सार्वजनिक भएको छ यद्यपि अब्बासीको नेपाल- भ्रमणका अन्य आयाम पनि छन् । द्विपक्षीय सम्बन्धलाई उच्चस्तरको निरन्तरता प्रदान गर्नु एउटा पाटो हो भने ‘सार्क’ सन्दर्भको दक्षिण एसियाली क्षेत्रीय मञ्च अर्को पक्ष हो ।

ओली यसपल्ट  प्रधानमन्त्री पदमा बहाल भएपछि नेपाल आउने पहिलो विदेशी सरकारप्रमुख पाकिस्तानका अब्बासी पर्नु एउटा संयोग हो; विमानस्थलको साटो सदर टुँडिखेलमा सैनिक सम्मान गारदका साथ औपचारिक स्वागत पाउने पहिलो पाहुना पनि अब्बासी नै पर्नु अर्को संयोग हो । नेपाल र पाकिस्तानबीचको सम्बन्धमा न्यानोपन थप्न अब्बासी-भ्रमणले सघाउ पु-याउने अनुमान गर्न सकिन्छ ।

जहाँसम्म दक्षिण एसियाका देशहरू बीचका सम्पर्क र आपसी सहयोगका विषय छन् तिनलाई क्रियाशील र सार्थक बाटोमा डोर्‍याउन नेपाल र पाकिस्तान एक तहमा सहमत भएका छन् । ओली-अब्बासी वार्तापछि सरकारी स्तरबाट सार्वजनिक गरिएका सूचनाले विगत तीनवर्ष अवरुद्ध रहेका सार्क प्र क्रिया अब निष्क्रियताको अवस्थाबाट उम्किने सङ्केत दिएका छन् । सन् २०१४ मा १८औं शिखर सम्मेलन नेपालमा भएपछि अर्को वर्ष इस्लामाबादमा आयोजना गर्दै पाकिस्तानले अध्यक्षता लिने निधो भएको थियो तर त्यसबीच भारत-पाकिस्तान सम्बन्धमा तनाउ आएकोले सम्मेलन स्थगित हुनपुग्यो । फलस्वरूप, सार्कका आर्थिक सामाजिक कार्यक्रमहरू अगाडि बढ्न सकेनन् । यस क्षेत्रमा व्याप्त गरीबी,रोग र अशिक्षाको असरलाई कम गर्ने प्रयत्न पछि पर्न गए । अब आगामी दिनमा सार्क गतिविधिमा तीव्रता आएछ भने सन् १९८५ मा स्थापित यस क्षेत्रीय संगठन बडापत्रको भावनाअनुरूप सक्रिय हुन पाउनेछ । १९औं सम्मेलन छिटै हुने अपेक्षा गरौं ।

यातायात र सञ्चार क्षेत्रीय व्यापारको लागि पूर्वाधार हुन् भन्ने निष्कर्ष सार्कले निकै अघि निकालेको हो र ‘कनेक्टिभिटी’ त्यसै परिप्रेक्ष्यमा चर्चित नारा बनेको थियो । एक समय क्षेत्रीय व्यापारको परिमाणमा क्रमिक वृद्धि देखिएको पनि हो र सार्कका सबै मुलुकका राजधानीलाई एक-आपसमा हवाई सेवाबाट जोड्ने सिलसिला पनि बसेको थियो । पछि अकारण त्यसमा शिथिलता आयो जसले गर्दा सार्क सम्मेलन, बैठकहरूको लागि सरकारी पदाधिकारीहरूले समेत घुमाउरो र खर्चिलो बाटोबाट यात्रा तय गर्नुपरिरहेको छ । सांस्कृतिक आदानप्रदानका सिलसिलाहरू प्रभावित भएका छन् । यसकारण सार्क भावनालाई पुन: जगाउने अठोट सदस्य-राष्ट्रहरूमा आएको हो भने यसको थालनी हवाई सम्पर्क स्थापनाबाट गर्नु समयोचित ठहरिएला ।