सुर्खेत, ३ चैत–  भौतिक पुर्वाधार विकास मन्त्री खड्क खत्रीले नेपालको हरेक क्षेत्रमा दलाली प्रथा डरलाग्दो तवरमा बढेको बताएका छन् । शनिबार वीरेन्द्रनगरमा स्थानीय तह कर्मचारी संघ, नेपाल कर्णाली प्रदेशको पहिलो अधिवेशनलाई सम्वोधन गर्दै जग्गामा, शिक्षामा, ठेकेदारीमा, विदेश पठाउनेमा, विल भुक्तानी गर्ने देखि जग्गा कारोवार गर्नेसम्म दलाली बढेको बताए । उनले अब दलालीकै कारणले काम कारवाही रोक्न नहुने बताउादै यसतर्फ सबै सचेत हुन जररी रहेको उनको भनाइ थियो ।

मन्त्री खत्रीले प्रदेश सरकार झ्याल मात्रै भएको बताएका छन् । ‘घरको जग स्थानीय सरकार र छत संघीय सरकार हो ।’ उनले भने, ‘झ्याल त चाहेको समयमा टाल्न पनि सकिन्छ नि ।’ 
मन्त्री खत्रीले कर्मचारीहरु बीचमै विभेद भएको बताउँदै उक्त विभेद हटाउने अहिले आफूहरुसँग क्षेत्राधिकार नभएको समेत बताए । ‘तपार्इंहरू आफ्ना समस्या एकातिर र ति समस्या समाधान गर्ने उपायहरु अर्कोतिर गरी आवश्यक दस्तावेज सहित आउनुहोस्,’ उनले भने, ‘तपाइहरुका मागलाई कसरी सम्वोधन गर्न सकिन्छ, प्रदेश सरकारका तर्फबाट हामी पहल गर्छौं ।’

देशका सबैले विधि मान्नुपर्नेमा उनले जोड दिए । ‘हामी सबैले विधि अनुरप चल्न जरुरी छ ।’उनले भने, ‘समृद्धि ल्याउन ऐन, नियम मानेर कार्यान्वयन गर्न जरुरी छ ।’ मन्त्री खत्रीले अहिले नेपालमा संगठनमुखी, नेतामुखी वातावरण बन्दै गएको बताए । ‘आफ्नो काम एकातीर हुन्छ, कर्तव्य एकातिर हुन्छ ।’ उनले थपे, ‘तर उसलाई विभिन्न बहानामा संगठन खोलन आतुरी लाग्छ र नेता बन्न खोज्छ ।’ उनका अनुसार यहि जसले पायो, जहाँ पायो संगठन खोल्ने, दबाब दिने परिपाटीकै कारण देश विकास हुन नसकेको हो ।

फरक प्र्रसंगमा देश भ्रष्टाचारको कारण छिया छिया भएको उनले बताए । ‘ठुला भनाउँदा नेताहरु र ठूला भनाउँदा कर्मचारीहरु जो जम्मा १० प्रतिशत छन् ।’ उनले भने, ‘उनीहरुले देशलाई छिया छिया बनाएका छन् ।’ ती भ्रष्टाचारीले विदेशको भिषा र पिआर लिइसकेकाले उनीहरुलाई देशको मायासमेत नभएको बताए ।

कार्यक्रमलाई सम्वोधन गर्दै केन्द्रीय अध्यक्ष हरि कुमार श्रेष्ठले संविधानमा भएका अधिकारहरु कार्यान्वयन मात्रै गरिदिएपनि धेरै सहज हुने बताए । उनले कर्मचारीहरु कर्मचारी नै भएर रहन तयार रहेको बताउँदै प्रदेश तथा केन्द्र सरकारलाई नीति बनाउन र कार्यान्वयन गर्न आग्रह गरे ।

कार्यक्रममा कर्णाली प्रदेश अध्यक्ष टंकप्रकाश लामीछाने सांगठनिक प्रतिवेदन प्रस्तुत गरेका थिए ।