काभ्रे, ३ चैत– हतियारसहित पक्राउ परेका गुण्डा नाइके एवम् कांग्रेस 'नेता' गणेश लामाको रिहाइको माग गर्दै नेपाली कांग्रेसले काभ्रेको बनोपामा जुलुस निकालेको छ । 

लामाको पक्राउको बिरोध गर्दै निकालिएको जुलुसमा झडप हुँदा प्रहरीले २ राउण्ड अश्रु ग्यास प्रहार गरेको छ । कांग्रेस कार्यकर्ता र प्रहरीबीच झडप भएको थियो । झडपको स्थितिलाई नियन्त्रणमा लिन अश्रुग्यास प्रहार गर्नु परेको काभ्रे प्रहरीले जनाएको छ । 

लामाको रिहाइको माग गर्दै कांग्रेस सम्बद्ध युवाहरुले शनिवार साँझ बनेपामा मसाल जुलुस निकालेका थिए । काभ्रे प्रहरी प्रमुख एसपी सहकुल थापाले कांग्रेस कार्यकर्ताले प्रहरीमाथि ढुङ्गा मुडा प्रहार गर्न थालेपछि अश्रु ग्यास प्रहार गरेको बताएका छन् । 

यसअघि गुण्डागर्दीमा संलग्न रहँदै विजय गच्छदार नेतृत्वको तत्कालीन फोरम लोकतान्त्रिक हुँदै कांग्रेस प्रवेश गरेका गणेश लामा बुधवार काठमाडौंको गौशालाबाट पक्राउ परेका थिए । 

प्रहरीले उनको साथबाट एक चाइनिज पेस्तोल र त्यसमा प्रयोग हुने ६ राउण्ड गोली बरामद गरेको थियो । प्रहरीले लामाविरुद्ध हातहतियार तथा खरखजना ऐनअन्तर्गत अनुसन्धान अगाडि बढाएको छ ।