काठमाडौँ, ४ चैत– गृहमन्त्री रामबहादुर थापा ‘बादल’ले ट्राफिक व्यवस्थापन लगायत सडक यातायातको क्षेत्रमा सुधार ल्याउने विषयलाई उच्च प्राथमिकतामा राखेर काम शुरु गरेका छन् ।

‘लोडसेडिङमुक्त नेपाल सम्भव भएझैं  ट्राफिक जाममुक्त नेपाल’ पनि सम्भव रहेको भन्दै गृहमन्त्रीले आफ्नो ध्यान त्यसतर्फ केन्द्रित गरेका हुन् । बादलले गृहमन्त्रालय सम्हाले लगत्तै यो विषयमा केन्द्रीत रहेर तीन वटा बैठक डाकिसकेका छन् । 

यस विषयमा पहिलोपल्ट फागुन २९ गते बादलले भौतिक पूर्वाधार तथा यातायात मन्त्रालयका सचिव, यातायात व्यवस्था विभागका महानिर्देशक, सडक विभागका महानिर्देशक, महानगरीय ट्राफिक प्रहरी महाशाखाका प्रमुखसहितको डाके । 

बैठकले गृहमन्त्री बादलको अध्यक्षतामा गृह मन्त्रालयका सचिव, सूचना तथा सञ्चार मन्त्रालयका सचिव, अर्थ मन्त्रालयका सचिव, भौतिक पूर्वाधार तथा यातायात मन्त्रालयका सचिव, उर्जा, जलस्रोत तथा सिचाई मन्त्रालयका सचिव, सार्वजनिक खरिद अनुगमन कार्यालयका सचिव, प्रहरी महानिरीक्षक, काठमाडौँ महानगरपालिकाका मेयर, ललितपुर महानगरपालिकाका मेयर लगायत सदस्य रहेको  निर्देशन तथा अनुगमन समिति गठन गरेको थियो ।

सो लगत्तै दुई दिनपछि चैत १ गते फेरी अर्को बृहत बैठक गृहमन्त्रीको अध्यक्षतामा बस्यो । गृहमन्त्रालयमा बसेको सो बैठकमा गृहमन्त्री बादलले ट्राफिक व्यवस्थापन गर्न तथा धुलो, धुँवा हटाउने विषयमा काठमाडौँ, ललितपुर, भक्तपुर जिल्लाभित्रका महानगरपालिका र नगरपालिकाका मेयर, नेपाल प्रहरी, सशस्त्र प्रहरी बल, राष्ट्रिय अनुसन्धान विभागका प्रमुख, तिनै जिल्लाका प्रमुख जिल्ला अधिकारी, तिनै जिल्लाका प्रहरी प्रमुख उपस्थित थिए । 

सो बैठकमा उपस्थित सबै अधिकारीहरुले ट्राफिक व्यवस्थापनका बिभिन्न उपायबारे बृहत रुपमा चर्चा गरेका थिए । सो बैठकले उपत्यकाभित्रका ‘जेब्रा क्रसिंङ’ भएका ठाउँमा तत्काल रंगरोगन गरेर चिन्ह राख्ने, ठूला सवारी साधन(मालबाहक गाडी)हरुका लागि चक्रपथ बाहिर पार्किङको व्यवस्था मिलाउने र त्यसको प्रक्रिया सम्बन्धित महानगरपालिका र नगरपालिकाले मिलाउने निर्णय गरेको थियो ।

यस्तै चक्रपथभित्रका ‘ड्राइभिङ सेन्टर’, र गाडी मर्मतका लागि खोलिएका  ‘वर्कशप’लाई चक्रपथ बाहिर सार्नका लागि सम्बन्धित महानगरपालिका, नगरपालिका र ट्राफिक प्रहरीले नेतृत्व गर्ने, टुरीस्ट बसलाई कान्तिपथबाट तत्काल हटाउनका लागि काठमाडौा महानगरपालिका र ट्राफिक प्रहरीले समन्वय गर्ने, उपत्यका बाहिर जाने गाडीहरुको बसपार्क सम्बन्धित महानगर, नगरपालिका र ट्राफिक प्रहरीले मिलाउने बैठके निर्णय गर्यो ।

बिगे्रका गाडीहरुले सवारी आवागमनमा अवरोध पुर्याउने कार्य बढदो रहेकोले यसलाई व्यवस्थित गर्न बिभिन्न चार ठाउँमा ‘र्याकर’को व्यवस्था गर्ने,  टेलिफोन, इन्टरनेट र केवलका तारहरु जथाभावी राख्ने प्रवृत्ती निरुत्साहित गर्न सूचना तथा सञ्चार मनत्रालय र सम्बन्धित महानगरपालिकाहरुो समन्वयमा व्यवस्थित गर्ने, ट्राफिक जाम कम गर्न यात्रु चढाउने र ओराल्ने मात्र गर्ने, पार्किङ गरी सडकमा जाम गर्नेहरुलाई तत्काल कारवाही प्रक्रिया अगाडी बढाउने निर्णय बैठकले गरेको छ ।

ट्राफिक व्यवस्थापनकै छलफलको क्रममा आज (आइतवार) पनि गृहमन्त्री बादल संयोजक रहेको निर्देशन तथा अनुगमन समितिको बैठक बस्यो । गृहमन्त्रीको अध्यक्षतामा बसेको बैठकमा गृह मन्त्रालयका सचिव, सूचना तथा सञ्चार मन्त्रालयका सचिव, भौतिक पूर्वाधार तथा यातायात मन्त्रालयका सचिव, उर्जा, जलस्रोत तथा सिचाई मन्त्रालयका सचिव, सार्वजनिक खरिद अनुगमन कार्यालयका सचिव, अर्थ मनत्रालयका प्रतिनिधि, प्रहरी महानिरीक्षक, काठमाडौँ महानगरपालिकाका मेयर, ललितपुर महानगरपालिकाका मेयर लगायत उपस्थिती रहेको थियो ।

आज बसेको बैठकले सात दिनभित्र आ–आफ्नो निकायहरुको सुधार कार्ययोजना सहित आगामी बैठकमा उपस्थित हुने निर्णय गरेको छ । यस्तै गृहमन्त्रालयका सहसचिव संयोजक रहेको समन्वय समिति समेत गठन गरेको छ ।

गृहमन्त्रीले सडक, पुल निर्माणमा ढिलासुस्ती हुनुमा भ्रष्टाचार र अनियमितता जोडिएको भन्दै त्यसको पनि छानबिन गरीने बताएका छन् । थोरै जरिवाना भएका कारण ट्राफिक नियम उलङ्घनको घटना बढेको भन्ने सरोकारवालाहरुको गुनासोलाई संवोधन गर्न जरिवाना बढाउन तथा कानुनलाई थप कडाई गर्ने उद्घोष गृहमन्त्रीले गरेका छन् ।