सुर्खेत, ५ चैत

सुर्खेत बुलबुल ताल माया, 
मै सानी हुनाले छ्ट्यो मायाजाल !

यहि गीतले चर्चित कर्णाली प्रदेशको मुटुमा रहेको बुलबुले तालमा र्‍याफ्टिङ शुरु भएको छ । भेरी कर्णाली र्‍याफ्टिङ एडभेन्चर प्रालिले बुलबुलेको ठूलो तालमा शनिबारदेखि र्‍याफ्टिङ सेवा सञ्चालनमा ल्याएको हो । उपत्यका नगर विकास समितिसँगको सहकार्यमा र्‍याफ्टिङ सञ्चालनमा ल्याइएको सञ्चालक समुन्द्र गौतमले बताए ।

र्‍याफ्टिङमार्फत बुलबुले तालको शयर गर्न ३० देखि ४० मिनेटको समय लाग्छ । भेरी कर्णाली र्या‍पिड एडभेन्चर प्रालिले प्रतिव्यक्ति एक सय रुपियाँ र विद्यार्थीका लागि ५० प्रतिशत छुटको व्यवस्था गरेको छ । र्‍याफ्टिङमा चढेर एक पटकमा १२ जनासम्मले तालको अवलोकन गर्न पाउँछन् ।

भेरी नदीमा र्‍याफ्टिङ गराउँदै आएको भेरी कर्णाली र्‍याफ्टिङ एडभेन्चर प्रालिले नगर विकास समितिको आग्रहमा बुलबुलेमा पनि सुरु गरेको हो । 

‘भेरी कर्णालीले भेरीमा दैजिनक दुई वटा र्‍याफ्टिङ सञ्चालन गर्दै आइरहेको छ । ‘बुलबुलेमा आउने पर्यटकहरुलाई थप सेवा दिन र केही समयका लागि भएपनि पानीमा शयर गराउने उद्देश्यले ¥याफ्टिङ सञ्चालनमा ल्याएका छौं’ गौतमले भने, ‘बजारभित्रैकै प्रमुख पर्यटकीय स्थल भएकाले नियमित सञ्चालन हुने अपेक्षामा छौं ।’

उपत्यका नगर विकास समितिका अध्यक्ष नारायण कोइरालाले बुलबुलेमा आउने आन्तरिक तथा बाह्य पर्यटकहरुको मनोरञ्जनका लागि ¥याफ्टिङ सञ्चालनमा ल्याइएको बताए । ‘ताल ठूलो भएपनि यहाँ आउने पर्यटकहरु बाहिरैबाट हेरेर फर्किने अवस्था थियो’ उनले भने, ‘अव र्‍याफ्टिङमार्फत तालको शयर गरेर मनोरञ्जन पनि लिन सक्नुहुनेछ ।’

उनले पछिल्लो समय बुलबुलेले स्वरुप फेर्दै गएकाले आन्तरिक तथा बाह्य पर्यटकहरुको आवागमन पनि बढेको बताए । 

‘र्‍याफ्टिङले पर्यटक आकर्षित गर्न थप मद्दत गर्नेछ’ उनले भने, ‘कर्णाली प्रदेशको राजधानी वीरेन्द्रनगरको केन्द्र भागमा भएकाले पनि र्‍याफ्टिङ पर्यटकहरुको रोजाईमा पर्छ ।’

उनले सुरुको १० दिन भेरी कर्णाली र्‍यापिड एडभेन्चर प्रालिलाई ट्रायलका लागि निःशुल्क सञ्चालन गर्न दिइएको बताए । ‘१५ दिनसम्मको अवस्था हेरेर कम्पनीसँग वार्षिक संझौता गछौं’ उनले भने, ‘यसले पर्यटक आकर्षित गर्न सघाउ पुर्‍याउँछ नै नगर विकास समितिको आम्दानीमा पनि सहयोग पुग्छ ।’