काठमाडौं, ४ फागुन– भारतीय सशस्त्र सीमा बल (एसएसबी)बाट हत्या गरिएका नेपाली नागरिक मुकुल राय यादवको परिवारलाई क्षतिपूर्ति दिन राष्ट्रिय मानव अधिकार आयोग भारतले भारत सरकारलाई निर्देशन दिएको छ । 

एसएसबीको कुटपिटबाट २०६६ अजोसमा रौतहटको तत्कालीन सरमुजवा गाविसका मुकुल राय यादको मृत्यु भएको थियो । यादवको परिवारलाई क्षतिपूर्ति दिन भारतीय मानव अधिकार आयोगले भारत सरकारलाई निर्देशन दिएको हो । 

राष्ट्रिय मानव अधिकार आयोग नेपालकी प्रवक्ता मोहना अन्सारीले आज (सोमवार) एक विज्ञप्ती जारी गर्दै यादवको परिवारलाई क्षतिपूर्ति दिन भारतको मानव अधिकार आयोगले निर्देशन दिएको जनाएकी छन् । 

राष्ट्रिय मानव अधिकार आयोग नेपालले नेपाल–भारत सीमा नजीकै एसएसबीद्वारा हत्या गरिएका पीडित मुकुल राय यादवको घटना सम्बन्धमा भारतीय राष्ट्रिय मानव अधिकार आयोगलाई जानकारी गराउँदै घटनाको सत्य छानविन गर्न अनुरोध गरेको थियो । 

आयोगको अनुरोधलाई भारतीय राष्ट्रिय मानव अधिकार आयोगले गम्भीरतापूर्वक लिइ घटनाको निष्पक्ष अनुसन्धान मार्फत घटनाका दोषि एसएसबी रहेको भन्दै पीडित परिवारलाई क्षतिपूर्ति स्वरूप पाँच लाख भारतीय रुपैयाँ उपलब्ध गराउन सन् २०१७ मा भारतीय सरकारलाई निर्देशन दिएको थियो । 

उक्त घटनाका सम्बन्धमा आयोगका अध्यक्ष अनूप राज शर्माको नेतृत्वमा भारत गएको टोलीले त्यहाँका समकक्षीलाई पीडितको परिवारलाई उक्त रकम प्राप्त हुने गरी आवश्यक पहल गरी दिन तथा भविष्यमा पनि मानव अधिकारका साझा विषयहरूमा सीमा क्षेत्रमा आवश्यक समन्वय हुन समेत अनुरोध गरेको थियो ।

भारतीय आयोगबाट हालै प्राप्त अर्को पत्र अनुसार मानव अधिकार उल्लंघनका पीडित मुकुल राय यादवकी पत्नी उर्मिला देवीलाई क्षतिपूर्ति स्वरूपको रकम उपलब्ध गराउन भारतीय गृह मन्त्रालय मार्फत काठमाण्डौंस्थित भारतीय दुतावासलाई अनुरोध गरिएको छ । 

मानव अधिकारको संरक्षण तथा मानव अधिकार उल्लंघनका पीडितहरूको परिपूरणका सवालमा राष्ट्रिय मानव अधिकार आयोग, नेपालले विभिन्न देशका राष्ट्रिय मानव अधिकार संस्थाहरूसँग समन्वय गर्दै आएको छ ।