काठमाडौं, १७ चैत– आफूभन्दा कथित तल्लो जातको भनेर एक कलाकारलाई होच्याएकी देउडा गायिका चाँदनी मल्लले अन्ततः माफी मागेकी छन् । जातीय रुपमा अन्य समुदायलाई होच्याएर सामाजिक संजालमा निकै आलोचना खेपेपछि गायिका मल्लले माफी मागेकी हुन् ।
 
गायिका मल्लले बाडुली नामक कार्यक्रममा गायिका दिपा रोकायासंग लिएको अन्तरवार्ता युटुबमा हेरेर दर्शकले उनको प्रस्तुतीबारे कमेन्ट गरेका थिए । गायिका मल्लले आफ्नो नामबाट संचालन गरेको युट्यूब च्यानलमा उक्त कार्यक्रम अपलोड गरेकी थिइन् । 

दर्शकले  गायिका मल्लले कार्यक्रममा अतिथिलाई ‘तिमि’ भनेर सम्बोधन गरेको ठीक नभएको भन्दै कमेन्ट गरेका थिए । सोही बिषयलाई लिएर गायिका मल्लले गायिका दिपा रोकायालाई फोन र फेसबुक च्याटमा जातिय रुपमा होच्याएकी थिइन् । उनले फेसबुक च्याटमा भनेकी थिइन्, ‘मलाई त नेवार्नी रे, दार्चुलाका खस्स्या (क्षेत्री) हरुलाई के थाहा म मल्ल ठकुरी राजा हुँ भनेर ।’ फेसबुक च्याटमा उनले आफूलाई ठूलो जातकी भनेर अन्य शब्दहरु पनि लेखेकी छन् । 

गायिका मल्लले हेपेको फेसबुक च्याटको स्क्रिन सट आफ्ना साथीहरुमाझ सेयर गरेपछि सो कुरा सामाजिक सञ्जालमा भाइरल बनेको थियो । कलाकारजस्तो व्यक्तिबाट जातीय अहमता र विभेदपूर्ण व्यवहार भएको भन्दै गायिका मल्लको आलोचना भएपछि उनले हिजो (शुक्रवार) राति आफ्नो फेसबुक स्टाटसमा माफी माग्दै आफूबाट गल्ती भएको स्वीकारेकी छन् । 

सुदूरपश्चिम क्षेत्र, हालको ७ नम्बर प्रदेशकी देउडा सेलीब्रेटीका रुपमा पनि चिनिने गायिका चाँदनी मल्लले टिभी टुडेबाट संचालन गर्ने टेलिभिजन कार्यक्रम बाडुलीमा बिभिन्न देउडा कलाकारलाई ल्याएर कुराकानी गर्ने गर्छिन् । 

आफूले सम्मान गर्दै आएको गायिका मल्लमा जातीय भदभावजन्य सोच रहेको भन्दै दिपाले दुःख व्यक्त गरेकी छन ।