सिण्डिकेटविरुद्ध सरकार कडा, व्यवसायीले नचलाए गाडी कब्जामा लिएर चलाउने !

बैशाख ४, २०७५

काठमाडौं, ४ वैशाख– सिण्डकेटको पक्षमा आन्दोलनमा उत्रिएका व्यवसायीविरुद्ध सरकारले थप कडा रणनीति अख्तियार भएको छ । यातायात व्यवसायीहरू कानूनविपरित सिण्डकेट लाद्न पाउनुपर्ने भनी आन्दोलनमा उत्रिएपछि सरकारले गाडी नै कब्जामा लिएर चलाउने चेतावनी दिएको हो ।

गृहसचिव प्रेमकुमार राईले व्यवसायीहरूले आन्दोलन गरे सरकार आन्दोलनविरुद्ध कडारूपमा उत्रिने र सवारी साधन आफैँ कब्जामा लिएर चलाउने बताए ।


‘व्यसायीहरूले सवारी चलाउन अनुमति लिएका छन्, त्यसैअनुसार काम गर्नुपर्छ, नीति नियमविरुद्ध आन्दोलनमा उत्रिए कानूनबमोजिम कडाभन्दा कडा कारबाही गर्दै सवारीसाधन सुरक्षा निकायले कब्जामा लिएर चलाउँछन्,’ सचिव राईले लोकान्तरसँग भने, ‘सरकारले जनतालाई सेवा दिनुपर्छ, सेवा दिनका लागि हामीले गाडी कब्जामा लिनुपरे पनि लिन्छौं, व्यवसायीले कानून मान्नैपर्छ ।’

सरकारले यातायात क्षेत्रको सिण्डिकेट हटाउन जारी गरेको यातायात व्यवस्था निर्देशिकाविरुद्ध यातायात व्यवसायी आन्दोलनमा उत्रिएका हुन् ।

नेपाल यातायात व्यवसायी राष्ट्रिय महासंघको अगुवाइमा विभिन्न यातायात सम्वद्ध संस्थाहरूले सिन्डिकेटविरुद्ध जारी गरेकोे यातायात व्यवस्थापन निर्देशिका खारेजीको माग गर्दै वैशाख २० गते देशव्यापी चक्काजाम गर्ने निर्णय गरेका हुन् ।

सरकारले सुनुवाइ नगरे वैशाख २६ गतेदेखि अनिश्चितकालीन बन्दको घोषणा गरेका छन् । महासंघले भने आन्दोलनका कार्यक्रमलाई गोप्य राखेको छ । आन्दोलनका बारेमा बुधवार पत्रकार सम्मेलन गरेर जानकारी दिने महासंघका अध्यक्ष योगेन्द्रनाथ कर्माचार्यले बताए ।

सरकारले निर्देशिकामार्फत कम्पनी मातहतमा सार्वजनिक यातायात चलाउनुपर्ने, यातायात समिति असारदेखि नविकरण नगर्ने लगायतका मुद्दा अघि बढाएको थियो ।

सरकारले नै अनुमति दिएपछि काठमाडौंदेखि बनेपासम्म मयुर यातायातले सेवा थालेको थियो । मयुर यातायातको सेवाविरुद्धमा कोटेश्वरपूर्वका यातायात व्यवसायीले सार्वजनिक यातायात बन्द गरेपछि सरकारले एकैदिन पाँचवटा कम्पनीलाई अस्थायी रुट इजाजत दिएको थियो ।

बैशाख ४, २०७५ मा प्रकाशित

प्रतिक्रिया दिनुहोस