काठमाडौं, ९ वैशाख- नेपाल कम्युनिष्ट पार्टीको स्थापना दिवसका अवसरमा एमाले र माओवादी केन्द्रले आयोजना गरेको संयुक्त कार्यक्रमको ब्यानरमा मार्क्स र लेनिनको फोटो नराखिएको भन्दै कार्यकर्ताले नाराबाजी गरेपछि ब्यानर हटाइएको छ ।

ब्यानरमा मार्क्स र लेनिनको फोटो नराखिएको भन्दै विशेषगरी माओवादी कार्यकर्ताले नाराबाजी गरेका हुन् । 

'नेपाल कम्युनिष्ट पार्टी स्थापना दिवस' लेखिएको ब्यानरमा प्रधानमन्त्रीसमेत रहेका एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डका अलावा नेकपाका संस्थापक नेताहरू पुष्पलाल श्रेष्ठ, मदन भण्डारी र मनमोहन अधिकारीको फोटो थियो ।

श्रेष्ठ, अधिकारी र भण्डारीसंगै मार्क्स र लेनिनको पनि फोटो राख्नुपर्ने कार्यकर्ताको माग छ ।

राष्ट्रिय सभागृहमा मध्याह्न १२ बजे शुरु हुने भनिएको कार्यक्रम अझै शुरु हुन सकेको छैन । दोस्रो तहका नेता कार्यक्रमस्थलमा आइसके पनि शीर्ष नेताहरू आइपुगेका छैनन् ।

नाराबाजी गर्ने कार्यकर्तालाई ऊर्जामन्त्री समेत रहेका माओवादी नेता वर्षमान पुन अनन्तले सम्झाउने प्रयास गरेका थिए । त्यति गर्दा पनि नाराबाजी नरोकिएपछि ब्यानर हटाइएको हो ।