हिजोबाट मलमास शुरु, नवविवाहित जोडी सँगै बस्न नहुने मान्यता

काठमाडौं, ३ जेठ – यो वर्ष जेठ महिनामा मलमास परेको छ । एउटै महिनामा दुईवटा औंसी परे भने त्यसलाई मलमास भनिन्छ । जेठ १ गते औंसी छ भने ३० गते पनि औंसी छ ।

तिथिहरूको ज्योतिषीय गणना मिलाउनका लागि तीन वर्षमा एकचोटि मलमास पर्ने गर्छ । वर्षैभरि तिथिहरू घटबढ भइरहने हुँदा त्यसलाई मिलान गर्नका लागि एक महिना बढी अर्थात् अधिकमास हुने गरेको छ । 

ज्योतिषशास्त्रमा अधिकमासभर शुभ कार्यहरू गर्न नहुने विधान छ । त्यसैले जेठ महिनाभरि विवाहको कुनै पनि लगन परेको छैन । मलमासभरि अधिकमास महात्म्य तथा पुरुषोत्तम मास ग्रन्थको पारायण र अर्थश्रवण गर्ने विधान छ । 

अनि मलमासभरि नवविवाहित जोडीले सहवास गर्न नहुने विधान पनि छ । विवाह गरेपछिको पहिलो मलमास चाहिँ बार्नुपर्ने अनि श्रीमतीले माइती गएर बस्नुपर्ने चलन छ । 

खासमा मलमासभरि गर्भधारण गर्न नहुने मान्यताका कारण नवविवाहित जोडीलाई सँगै बस्न नदिइएको हो । ज्योतिषशास्त्रीहरूका अनुसार, मलमासमा गर्भधारण भएर जन्मिएको बच्चाको कुण्डली राम्रो हुँदैन । मलमासमा गरिएको
यौनकर्मबाट जन्मिएको बच्चाले परिवारलाई पिर्ने ज्योतिषीहरू बताउँछन् । 

यसरी हेर्दा नवविवाहित जोडी मात्र नभई पहिले नै विवाह गरेका र ढिलो बच्चा जन्माउने चाहना राखेका वा दोस्रो तेस्रो सन्तान जन्माउने योजना बनाएका व्यक्तिले पनि मलमासका बेलामा गर्भधारण गर्न नहुने देखिन्छ ।

यसको कुनै वैज्ञानिक कारणहरू भने फेला परेका छैनन् ।
 

जेठ ३, २०७५ मा प्रकाशित

प्रतिक्रिया दिनुहोस