काठमाडौं, ६ जेठ– सरकारले आगामी आर्थिक वर्ष २०७५/०७६ का लागि नीति तथा कार्यक्रम सोमबार संसदमा प्रस्तुत गर्दैछ । 

नीति तथा कार्यक्रमले प्रधानमन्त्री केपी शर्मा ओली नेतृत्वको सरकारको ‘सम्बृद्ध नेपाल सुखी नेपाली’ भन्ने नारालाई प्रभावकारी बनाउने योजना समेटेको सरकारी अधिकारीहरुले बताएका छन् ।  सरकारले विकासमा फड्को मार्ने र ठूला आयोजना कार्यान्वयनमा लैजाने गरी नीति तथा कार्यक्रमसहित बजेट निर्धारणको तयारी गरेको हो । 

राष्ट्रपति विद्यादेवी भण्डारीले संसदमा प्रस्तुत गर्ने नीति तथा कार्यक्रम आइतबारको मन्त्रिपरिषद् बैठकले परित गर्नेछ । रोजगारीका अवसर तथा उत्पादन र उत्पादकत्वमा वृद्धि र राष्ट्रिय गौरवका आयोजना कार्यान्वयनलाई नीति तथा कार्यक्रममा प्राथमिकतामा राखिएको छ । 

बजेट आउनुभन्दा कम्तीमा १५ दिनअघि सरकारको नीति तथा कार्यक्रम ल्याई छलफलसहित बजेट प्रस्तुत गर्नुपर्ने हुन्छ । तर, सरकारले त्यो समयभन्दा कम समय राखेर संसदमा नीति तथा कार्यक्रम प्रस्तुत गर्न लागेको हो ।

नयाँ सरकार गठनपछि नीति तथा कार्यक्रम बनाउन गठित तत्कालीन एमाले उपाध्यक्ष वामदेव गौतम नेतृत्वको कार्यदलले चुनावी घोषणापत्र र जनताका आकांक्षा तथा आवश्यकता अनुरूप विकास र समृद्धिलाई ध्यानमा राखि प्राथमिकता निर्धारण गर्दै कार्ययोजना तयार पारेर बुझाएको सिफारिसलाई आधार मान्दै सरकारले नीति तथा कार्यक्रम प्रस्तुत गर्ने तयारी गरेको छ ।

सरकारले कार्यक्रममा आगामी आवमा संविधानतः समाजवाद उन्मुख अर्थतन्त्रको बाटो पहिल्याने गरी दिगो, समावेशी र उच्चदरको आर्थिक वृद्धि हासिल गर्ने प्रमुख उद्देश्यसहितको नीति तथा कार्यक्रम बनाएको स्रोतले बताएको छ । 

स्रोतकाअनुसार कृषिको आधुनिकीकरण, व्यवसायीकरण र यान्त्रिकीकरण, जलविद्युत् उत्पादन, प्रसारण र वितरणलाई पनि बजेटले मुख्य प्राथमिकताको क्षेत्रका रुपमा राखेको छ । सडक, रेलमार्गको विस्तार र विमानस्थलको निर्माण तथा स्तरोन्नतिलाई पनि प्राथमिकता दिएको छ । 

सरकारले कार्यदलको प्रतिवेदन कार्यान्वयन भए ५ वषभित्र लाखौं संख्यामा रोजगारी सिर्जना हुने, निरपेक्ष गरिबी निवारण हुने, अधिकांश घरपरिवारका लागि गाँस, बास, शिक्षा स्वास्थ्य, स्वच्छ पिउने पानीको व्यवस्था हुने र मुलुकले दोहोरो अंकको आर्थिक वृद्धि हासिल गरी १० वर्षमा प्रतिव्यक्ति आय ५ हजार अमेरिकी डलर पुग्ने दाबी गरिएको छ ।

वर्षभरीमा गर्ने प्रमुख योजनालाई प्राथमिकतामा राखेर नीति तथा कार्यक्रम बनाउने गरिन्छ । नीति तथा कार्यक्रमका बारेमा सरकारले विभिन्न पक्षसँग छलफल पनि गरेको छ । देशको समृद्धिलाई ध्यानमा राखेर नीति तथा कार्यक्रम बनाउन अर्थविद्हरुले सुझाव दिएका छन् । 

अर्थविद् डा. शंकर शर्माले नीति तथा कार्यक्रमले आन्तरिक तथा बाह्य लगानी बृद्धिको वातावरण बनाउने गरी काम गर्न सके सरकारको सम्बृद्धिको सपना पुरा हुने बताए । उनले भने, ‘सरकारले आन्तरिक र बाह्य दुबै लगानीको बृद्धिदर उचित व्यवस्थापनमा ध्यान दिन सक्नुपर्छ । लगानी पनि ल्याउने कहाँ लगानी गर्ने भन्ने कुरा छुट्याउन सके सम्बृद्धिका टाढा छैन । योसँगै विकास खर्चमा पनि बृद्धि गर्ने र विकास खर्च समयमा खर्च गर्ने नीति पनि बनाउनुपर्छ ।’