काठमाडौं, ८ जेठ – भारतको कर्नाटक राज्यमा बहुमत जुटाउन नसकेको भारतीय जनता पार्टीले अझै पनि सरकार बनाउने आशा छोडेको छैन । 

बुधवार कांग्रेस र जेडीएस मिलेर सरकार बनाउन लागेका छन् । एचडी कुमारास्वामी यो सरकारका प्रमुख हुनेछन् । 

यति सबै हुँदा पनि भाजपाले विपक्षी गुटका विधायकहरूमा सम्प्रदाय, लिंगायत तथा आदिवासीको खेल खेलिरहेको छ । कांग्रेस र जेडीएसलाई यसले गर्दा डर लागेको छ र उनीहरू विधायकहरूलाई सम्झाइबुझाइ गरिरहेका छन् । 

नयाँ सरकार गठन भएपछि पनि कर्नाटकको नाटक जारी रहन सक्ने बताइएको छ । भाजपाका अध्यक्ष अमित शाह अझै पनि कांग्रेसलाई झड्का दिन सक्ने विश्वास गर्छन् । 

शाहले सोमवार कांग्रेस जेडीएसका विधायकहरूलाई नजरबन्द गरिएकोमा व्यंग्य कस्दै भने, ‘होटेलका कोठामा बन्द गरिएका विधायकहरूलाई अहिल्यै छोडियो भने पनि कांग्रेस जेडीएसले बहुमत जुटाउन सक्दैनन् ।’

कुमारास्वामीको सरकारका कर्नाटक कांग्रेसका प्रमुख जी परमेश्वरा उपमुख्यमन्त्री बन्न सक्छन् । परमेश्वरा दलित समुदायका हुन् । उता भाजपा चाहिँ लिंगायतलाई उपमुख्यमन्त्री बनाउने सिद्धान्त पेश गरिरहेको छ । 

कांग्रेसमा सबभन्दा धेरै लिंगायत विधायक छन् । सोह्र विधायक लिंगायत छन् भने वोक्कालिगा समुदायबाट ११ विधायक छन् । मन्त्रिमण्डलमा मुसलमानहरूलाई पनि प्रतिनिधित्व गराउने सम्भावना छ । कांग्रेसमा सात विधायक मुसलमान छन् ।

कुमारास्वामी पनि भाजपाले खेल खेल्ने सम्भावना रहेको स्वीकार्छन् । उनले भने, ‘भाजपाले जे पनि गर्न सक्छ तर हामी बहुमत परीक्षण जितेर सरकार बनाउनेछौं ।’

तर उनले मन्त्रिमण्डल गठनको बारेमा केही पनि बोल्न मानेनन् । दुई उपमुख्यमन्त्रीका विषयमा दबाब रहेको चाहिँ उनले स्वीकारे ।

एजेन्सी