जनकपुरधाम, ८ जेठ– बालिका बलात्कारको प्रयास र हत्याको अभियोगमा एक व्यक्तिलाई जिल्ला अदालत धनुषाले सर्वस्वसहित जन्मकैदको सजाय सुनाएको छ ।

धनुषाको मिथिला बिहारी नगरपालिका– ४ घर भई जनकपुर उपमहानगरपालिका वडा नं. १ बस्ने बिमला साह भनिने मञ्जु कार्कीकी छोरीलाई बलात्कारको प्रयास र हत्या गरेको कसुरमा जिल्ला अदालतले धनुषाले मुखियापट्टी मुसहरनिया गाउँपालिका– ५ घर भई जनकपुर उपमहानगरपालिका– १ बस्ने ३८ वर्षीय रामचन्द्र महतो नुनियारलाई जन्मकैदको फैसला सुनाएको हो ।

न्यायाधीश वासुदेव पौडेलको इजलासले ६ जेठ २०७५ मा उक्त फैसला सुनाएको हो ।

ज्यानसम्बन्धी महलको १३(३) बमोजिम सर्वस्वसहित जन्मकैद, जबरजस्तीकरणी उद्योगतर्फ ८ वर्ष कैद गरी कुल २८ वर्ष कैदको सजाय तोकिएको छ ।

३१ साउन २०७४ का उनले आफू नै बस्दै आएको घरबेटीका १२ वर्षीय छोरीलाई बलात्कार प्रयास गरेका थिए । बालिका जोडले कराएपछि आत्तिएर घाँटी थिच्दा बालिकाको मृत्यु भएको थियो । त्यसपछि उनले टिनको बाकसमा शव लुकाएका थिए ।

घरमा कोही नभएको अवस्थामा हत्या गरी लुकाएको शव प्रहरीले नुनियारको कोठा खनतलासी गर्दा फेला पारेको थियो । त्यसपछि ३१ साउन २०७४ मै उनलाई पक्राउ गरी अनुसन्धान शुरु भएको थियो ।

मृतक बालिकाका बाबुको मिर्गौला खराबीका कारण गत वर्ष नै मृत्यु भएको थियो । उनका आमा १–१ जना दिदीभाइ छन् ।