काठमाडौं, ११ जेठ –सर्वोच्च अदालतले तत्कालीन माओवादी केन्द्रका नेता एवं पूर्वसांसद बालकृष्ण ढुङ्गेललाई माफी दिनुपर्नाको कारण २४ घण्टाभित्र पेश गर्न सरकारलाई आदेश दिएको छ ।

न्यायाधीश दीपककुमार कार्कीको एकल इजालसले शुक्रवार ढुङ्गेललाई माफी दिनुपर्नाको कारण माग गरेको हो ।

माफीको प्रक्रिया रोक्न माग गर्दै वरिष्ठ अधिवक्ता दिनेश त्रिपाठीले दायर गरेको रिटमाथि सुनुवाई गर्दै न्यायाधीश कार्कीको एकल इजालसले आइतवार दुवै पक्षलाई छलफलका लागि बोलाएको छ । 

अन्तरिम आदेशको माग गरेकोले विपक्षीलाई झिकाएर बहस गर्ने निर्णय गरेको अधिवक्ता त्रिपाठीले लोकान्तरलाई बताए ।

सरकारले गणतन्त्र दिवसको अवसरमा ढुङ्गेललाई माफी दिने तयारी गरेको समाचार सार्वजनिक भएको छ ।

ओखलढुंगाका उज्जनकुमार श्रेष्ठको हत्या अरोपमा उनी २०७४ साल कात्तिक १४ गते ललितपुरबाट पक्राउ परेका थिए ।

जिल्ला अदालतले गरेको सर्वस्वसहित जन्मकैदको फैसलालाई सर्वोच्च अदालतले २०६६ पुस १९ गते सदर गरेको थियो ।

सर्वोच्चले ज्यान मुद्दामा सर्वस्वसहित जन्मकैदको फैसला सुनाएका ढुंगेललाई पक्राउ गर्न प्रहरीलाई सर्वोच्च अदालतले नै पटक-पटक ताकेता गरेको थियो ।