विराटनगर, ११ जेठ– साढे ३३ किलोसहितको ३८ क्विन्टल सुन तस्करी र मोरङका सनम शाक्य हत्या मुद्दामा मोरङ जिल्ला अदालतले धरौटी र साधारण तारेखमा छाडेका २ जना अभियुक्तविरुद्ध उच्च अदालत विराटनगरमा पुनरावलोकन निवेदन दर्ता हुने भएको छ । 

जिल्ला सरकारी वकिलको कार्यालय मोरङले जिल्ला अदालतबाट साधारण तारेखमा रिहा भएका प्रहरी जवान विष्णुबहादुर खड्का र १५ हजार धरौटी तिरेर रिहा भएका प्रहरी हवल्दार अम्बरबहादुर थापा मगरविरुद्ध उच्च अदालत विराटनगरमा पुनरावलोकन निवेदन दर्ता गर्न लागेको हो ।

खड्का सुन काण्डमा संलग्न भनेर प्रहरीको खोजी सूचिमा रहे पनि फरार रहेका नेपाल प्रहरीका निलम्बित एसएसपी श्याम बहादुर खत्रीका ड्राइभर थिए भने मगर खत्रीका अंगरक्षक थिए । 

जिल्ला सरकारी वकिलको कार्यालय मोरङले उनीहरूविरुद्ध सुन तस्करीमा संलग्न रहेको भन्दै संगठित अपराध नियन्त्रण ऐन लगायतअन्तर्गत जिल्ला अदालतमा मुद्दा दायर गरेको थियो । 

थुनछेक बहसका क्रममा उनीहरूविरुद्ध अभियोग लगाउने पर्याप्त प्रमाण नभेटिएको र उनीहरूलाई थुनामा राखिराख्नुपर्ने पर्याप्त आधार नभएको भन्दै मंगलवार (८ वैशाख) मा साधारण तारेख र धरौटी लिएर रिहा गरेको थियो । 

तर जिल्ला सरकारी वकिलको कार्यालयले जिल्ला अदालतको आदेशमा ‘चित्त नबुझेको’ भन्दै उच्च अदालतमा पुनरावलोकन गर्न लागेको हो । 

जिल्ला सरकारी वकिल कार्यालय मोरङका प्रमुख जिल्ला न्यायाधीवक्ता पुण्यप्रसाद पाठकले रिहा भएका दुवैजना विरुद्ध मुलुकी ऐनको अदालती बन्दोबस्ती महलको १७ नम्बरअन्तर्गत उच्च अदालतमा पुनरावलोकन निवेदन दर्ता गर्ने बताए । 

मुलुकी ऐन, अदालती बन्दोबस्ती महलको १७ नम्बरमा कुनै अदालतको आदेशमा चित्त नबुझे झगडीया पक्षले आदेश भएको १५ दिनभित्र सोभन्दा माथिल्लो अदालतमा पुनरावलोकन निवेदन दर्ता गर्न पाउने व्यवस्था छ ।