काठमाडौं, ३० जेठ – वरिष्ठ कलाकार भीमबहादुर थापाको ९२ वर्षको उमेरमा गएराति निधन भएको छ । पारिवारिक स्रोतका अनुसार लामो समयदेखि छाति, फोक्सोलगायत समस्याबाट पीडित उनको राति २ बजे निधन भएको हो ।

उनको आज पशुपति आर्यघाटमा अन्त्येष्टि गरिएको छ । आर्यघाटमा आफ्ना आफन्त, नेपाली चलचित्रका दर्शक र सयौं शुभचिन्तक पुगेका थिए ।

कलाकार थापाले दर्जनौं फिल्म, टेलीफिल्म र रेडियो नाटकमा अभिनय गरेका छन् । हाँस्य टेलिफिल्म तितोसत्यमा काम गरेपछि उनको लोकप्रियता चुलिएको थियो । उनी कलाकारितामा प्रवेश गर्नु अगाडि नेपाली सेनामा कार्यरत थिए । उनको निधनप्रति चलचित्रकर्मी र शुभचिन्तकले शोक व्यक्त गरेका छन् ।

को हुन् थापा ?

कलाकारितामा चिनिएको नाम हो, भीमबहादुर । १५ वटा नाटक, ६८ वटा फिल्म र डेढ सयभन्दा बढी टेलिफिल्ममा काम गरेका उनलाई चलचित्र क्षेत्रमा एउटा घरोहरको रूपमा लिइन्थ्यो । उनी सुबेदार भीमबहादुर थापाका नामले निकै चर्चित थिए ।

नेपाली सेनाको रेडियो कार्यक्रम ‘रेडियो रुपक’ मा २००८ देखि २०४५ सम्म लगातार ३७ वर्ष आवाज बुलन्द गरेका भीमबहादुरलाई रेडियोतर्फ पनि एउटा इतिहास मान्ने गरिन्छ । असार १३, १९८३ मा खोटाङमा जन्मिएका उनको अन्तिम चलचित्र छक्कापन्जा– २ हो । उनले पछिल्लो समय चलचित्रमा आएका अफरलाई अस्वस्थताका कारण छाड्दै आएका थिए ।

एक महिनादेखि अस्वस्थ

काठमाडौंको मैतीदेवी मन्दिरनजिकै बसोवास गर्दै आएका कलाकार थापा झण्डै १ महिनादेखि थला परेका थिए । स्वास्थ्यले क्रमैसंग साथ छाड्दै गएपछि उनलाई अस्पताल भर्ना गरिएको थियो । यसैक्रममा उनले आफ्नो प्राण त्यागे ।

९ रुपैयाँ तलब

१६ वर्षको उमेरमा साथीभाइको लहैलहैमा ब्रिटिस सेनामा भर्ति हुन देहरादुन पुगेका उनी १९४२ देखि १९४५ सम्म वर्मामा दोस्रो विश्वयुद्ध लडे ।

विश्वुद्धमा पटक–पटक बचेका उनी २००२ मा नेपाल आएलगत्तै नेपालको तत्कालीन शाही सेना ‘चौबीस पल्टन’ मा भर्ती हुने प्रस्ताव आयो । ३५ रुपैयाँको जागिर छाडेर नेपाल आएका उनले ९ रुपैयाँमा नेपाली सेनामा जागिर खान शुरु गरे । तत्कालीन प्रधानमन्त्री मोहन शमशेरको बडिगार्डका रूपमा समेत काम गरेका उनले २०४१ सम्म सेनामा जागिर खाए । रिटायर्ड हुँदा उनी मेजर पदमा थिए ।

थापाप्रति लोकान्तरका तर्फबाट पनि हार्दिक श्रद्धाञ्जली ।