अर्जेन्टिनाले खेल्यो पाँचचोटि पेनाल्टी शूटआउट, चारवटामा विजयी

जेठ ३०, २०७५

काठमाडौं, ३० जेठ – बिहीवारदेखि शुरू हुन लागेको २१औं फूटबल विश्वकपमा अर्जेन्टिना पनि प्रबल दाबेदार हो । अर्जेन्टिना सबभन्दा धेरै पाँचचोटि पेनाल्टी शूटआउटसम्म पुगेको छ र उसले चारवटा म्याचमा जितेको छ । 

पेनाल्टी शूटआउटमा इंग्ल्यान्ड सबभन्दा अभागी छ । उसले तीनचोटि पेनाल्टी शूटआउटको सामना गरेर तीनैवटामा हार बेहोरेको छ । 

अर्जेन्टिना सन् २००६ को विश्वकपमा जर्मनीविरुद्ध पेनाल्टी शूटआउटमा हारेको थियो । दुवै टीमबीचको क्वार्टरफाइनल खेल निर्धारित समयमा १–१ को बराबरीमा रह्यो । अनि पेनाल्टी शूटआउट हुँदा जर्मनीले अर्जेन्टिनालाई ४–२ ले हराइदियो । 

अघिल्लो विश्वकपमा अर्जेन्टिना र नेदरल्यान्ड्सका बीच भएको म्याच पेनाल्टी शूटआउटमा पुगेको थियो । त्यसमा अर्जेन्टिना विजयी भएको थियो ।

ब्राजिलले चाहिँ चार पेनाल्टी शूटआउट खेलेर तीनमा जीत हासिल गरेको छ । 

पेनाल्टी शूटआउटमा जर्मनीको प्रदर्शन सबभन्दा राम्रो छ । उसले चारवटा पेनाल्टी शूटआउटमा चारैमा विजय हासिल गरेको छ । 

अर्जेन्टिनाका सर्जियो गोएकोचे सबभन्दा धेरै गोल बचाउने कीपरमा संयुक्त रूपमा नम्बर एक स्थानमा छन् । पेनाल्टी शूटआउटमा उनले चार गोल बचाएका छन् । सर्जियोले सन् १९९० मा स्लोभाकियाविरुद्ध दुई र इटलीविरुद्ध दुई शट रोकेका थिए । 

जर्मनीका हेराल्ड शुमाकरले पनि चार शट रोकेका छन् । उनले सन् १९८२ मा फ्रान्सविरुद्ध दुई र सन् १९८६ मा मेक्सिकोविरुद्ध दुई शट रोकेका थिए । 

पोर्चुगलका रिकार्डो र ब्राजिलले टफारेलले विश्वकपमा तीन तीन शट बचाएका छन् । रिकार्डोले एउटै म्याचमा सबभन्दा धेरै तीन गोल बचाउने कीर्तिमान बनाएका छन् ।

एजेन्सी


ADVERTISEMENT

जेठ ३०, २०७५ मा प्रकाशित

प्रतिक्रिया दिनुहोस