फूटबलको 'महाकुम्भ' आजदेखि, यसकारण विशेष छ रुस विश्वकप

काठमाडौं, ३१ जेठ - खेलकुदको महाकुम्भ फिफा विश्वकप फूटबल प्रतियोगिता आजबाट रुसमा शुरु हुँदैछ । विश्वकपको २१औं संस्करणको शुरुवात आयोजक रुस र एसियन मुलुक साउदी अरेबियाबीचको भिडन्तबाट हुनेछ ।

उद्घाटन खेल रुसको राजधानी मस्कोस्थित लुजनिकी रंगशालामा नेपाली समयअनुसार बेलुका पौने ९ बजे शुरु हुनेछ । विश्वकपका खेलहरू मस्कोका दुईसहित ११ शहरका १२ रंगशालामा हुनेछन् ।

यसपटकको विश्वकपमा साबिकको विजेता जर्मनीसहित पूर्वविजेताहरू ब्राजिल, अर्जेन्टिना, स्पेन र फ्रान्सलाई मुख्य दाबेदारको रूपमा हेरिएको छ ।

यस्तै बेल्जियम, पोर्चुगल, इंग्ल्याण्डलगायतका मुलुकहरू पनि दाबेदारकै सूचीमा छन् ।

पुरस्कार कति ?

विश्वकपमा सहभागिता जनाउने सबै टीमले कम्तिमा ८० लाख डलर पाउने छन् । 

यस्तै राउण्ड अफ १६ मा पुग्ने टोलीले करीब १ करोड २० लाख डलर, अन्तिम ८ मा पुग्नेले १ करोड ६० लाख डलर, चौंथो हुनेले २ करोड  २० लाख डलर तथा तेस्रो हुनेले २ करोड ४० लाख डलर पाउने छन् ।

उपविजेताले २ करोड ८० लाख डलर पाउँदा विजेताको भागमा ३ करोड ८० लाख डलर पर्नेछ । विजेताले पाउने रकम करीब ४ अर्ब नेपाली रुपैयाँ हो ।

भिडियो असिस्टेन्ट रेफ्री

रुस विश्वकपको सबैभन्दा विशेष कुरा भिडियो असिस्टेन्ट रेफ्रीको व्यवस्था हो ।

विश्वकपका खेलहरू रेफ्रीको कतिपय निर्णयका कारण विवादित बन्ने गरेकोमा फिल्डमा रहने रेफ्रीलाई सघाउन भिडियो असिस्टेन्ट रेफ्रीको व्यवस्था गरिएको छ ।

मैदानमा रहेका रेफ्रीले नदेखेका कुरा भिडियो असिस्टेन्ट रेफ्रीले हेरेर सही निर्णय लिन सघाउने छन् ।

सायद मेस्सी र रोनाल्डोको अन्तिम विश्वकप !

वर्तमान फूटबलका दुई बादशाह लियोनल मेस्सी र क्रिस्टियानो रोनाल्डोले सम्भवत: अन्तिम विश्वकप खेल्दैछन् । सोही कारण पनि यो विश्वकप विशेष छ ।

मेसी ३१ वर्षमा टेक्दैछन् भने रोनाल्डो ३३ वर्षको भइसकेका छन् । अब ४ वर्षपछि कतारमा हुने विश्वकपमा उनीहरूको सहभागिता अन्योलमा छ ।

त्यसो त मेस्सीले आफ्नो अन्तर्राष्ट्रिय फूटबल करियरबारे निर्णय यही विश्वकपपछि लिने बताइसकेका छन् ।

अर्जेन्टिनाले विश्वकप जित्न नसकेमा सायद मेस्सीले आफ्नो अन्तर्राष्ट्रिय फूटबल यात्रालाई रुसमै विश्राम दिने सम्भावना प्रबल छ ।

रोनाल्डो मेसीभन्दा अझै २ वर्ष जेठा छन् । उनले तत्काल संन्यास नलिए पनि आगामी विश्वकपमा उनी सहभागी हुने सम्भावना न्यून छ ।

जेठ ३१, २०७५ मा प्रकाशित

प्रतिक्रिया दिनुहोस