काठमाडौं, १ असार – उपप्रधान तथा स्वास्थ्य मन्त्री उपेन्द्र यादवले नीति निर्माणको तहमा आयुर्वेदलाई कम महत्व दिएकाले आयुर्वेदिक क्षेत्र पछाडि परेको बताएका छन् ।

नेपाल आयुर्वेद अनुसन्धान तथा तालिम केन्द्रले आयोजना गरेको नेपालमा बाथरोग सम्बन्धी गोष्ठीमा उपप्रधान तथा स्वास्थ्य मन्त्री यादवले स्वास्थ्य नीतिमा आयुर्वेदिक क्षेत्रलाई कम महत्व दिइएकाले आयुर्वेदिक क्षेत्र पछाडि परेको बताएका हुन् । उनले आयुर्वेदिक क्षेत्रलाई प्राथमिकतामा राख्नुपर्ने समेत बताए । उनले भने, ‘नीति निर्माणमा आयुर्वेदलाई महत्व दिनुपर्छ, आयुर्वेदलाई प्राथमिकतामा राखेर अनुसन्धान, प्रचार र जडिबुटीको संरक्षण हुनुपर्छ ।’

उपप्रधान तथा स्वास्थ्य मन्त्री यादवले नेपालमा नै आयुर्वेदिक उपचार प्रणालीको विकास गर्न सके विदेशबाट औषधि आयात गर्न नपर्ने बताए । ‘विभिन्न कारणले गर्दा अहिले थरि–थरिका रोगको संक्रमण बढ्न थालेको छ, आयुर्वेदिक विद्हरूले समय र रोगको प्रकृति अनुसारका आयुर्वेदिक औषधि र उपचार पद्दतिको विकास गर्नुपर्छ,’ उपप्रधान तथा स्वास्थ्य मन्त्री यादवले भने, ‘योग र आयुर्वेदिक उपचारलाई सँगसँगै अगाडि बढाउन सकेमा रोगबाट बच्न सकिन्छ ।’

आमवाथको बहुआयामिक व्यवस्थापन विषयमा केन्द्रीत उक्त गोष्ठी नेपाल सरकार स्वास्थ्य मन्त्रालय मातहत रहेको राष्ट्रिय आयुर्वेद अनुसन्धान तथा तालिम केन्द्र कीर्तिपुरको आयोजनामा नेपाल, भारत, चीन, भुटान लगायत देशका आयुर्वेद, एलोपेथिक, न्याचुरोप्याथी, परम्परागत चिनियाँ चिकित्सा पद्दतिका चिकित्सक तथा वैज्ञानिकको सहभागिता रहेको थियो ।