काठमाडौं, ६ असार – फूटबल विश्वकपको सातौं दिन बुधवार तीनवटा खेल खेलिँदैछन् । पोर्चुगल र मोरक्कोबीचको खेल पौने ६ बाट, उरुग्वे र साउदी अरबबीचको खेल पौने नौबाट अनि स्पेन र इरानबीचको खेल पौने १२ बजेबाट शुरू हुँदैछन् । 

इरान समूह बी को शीर्ष स्थानमा छ । उसले स्पेनलाई हराएमा राउन्ड अफ १६ मा पुग्ने सम्भावना छ । इरानले पहिलो म्याचमा मोरक्कोविरुद्ध जीत हासिल गरेको थियो । 

आज सबैको नजर पोर्चुगलका कप्तान रोनाल्डोमाथि छ । उनले अघिल्लो म्याचमा स्पेनविरुद्ध ह्याटट्रिक गरेका थिए । संसारका सर्वोत्कृष्ट गोलकीपर मानिने डेभिड डी गीयालाई पनि छकाएर उनले तीन गोल हानेका थिए । रोनाल्डो चार
फरक विश्वकपमा गोल गर्ने संसारका चौथा खेलाडी हुन् । 

उरुग्वेका लुईस सुआरेज सयौं अन्तर्राष्ट्रिय खेल खेल्दैछन् । 

स्पेनको टीममा पनि धेरैको नजर रहनेछ । साना साना पास खेलेर गोल गर्ने स्पेनको विशषता हो । 

फ्रान्समा भएको युरो कप २०१६ को विजेता टोली पोर्चुगलले पहिलो खेलमा स्पेनलाई रोकेको भएपनि फूटबल विशेषज्ञहरू उसलाई उपाधिको दाबेदार मान्दैनन् । पूरै टीम रोनाल्डोमा निर्भर रहनु यसको कारण हो । 

स्पेनले तीन गोल हानेर पोर्चुगलको डिफेन्सलाई छेडेको पनि हो । रोनाल्डोबाहेक अन्य खेलाडीले गोल गर्ने सम्भावनासम्म पनि देखाएनन् । 

तर आज मोरक्कोलाई हराएर अन्तिम १६ मा स्थान बनाउने दिशामा मजबूतीका साथ बढ्ने लक्ष्य पोर्चुगलले लिएको छ । यी दुवै टीमबीच विश्वकपमा यो दोस्रो खेल हो । यसअघि सन् १९८६ मा मोरक्कोले पोर्चुगललाई ३–१ ले
हराएको थियो । 

उरुग्वे पनि आज देशका लागि सयौं खेलमा उत्कृष्ट प्रदर्शन गर्ने ध्याउन्नमा हुनेछन् । इजिप्टविरुद्धको खेलमा उनले गोल गर्ने दुईतीन कोशिश गरेको भएपनि सफल भएनन् । आज टीमलाई जिताएर राउन्ड अफ १६ मा पु–याउने
सम्भावनालाई उनी बलियो बनाउन चाहन्छन् । 

रुससँग साउदीले खेलेको खराब खेलपछि उरुग्वेले पनि उसलाई सजिलै हराउने अनुमान गरिएको छ । 

साउदीले सन् १९९४ पछि चारवटा विश्वकपमा भाग लिएको छ तर एउटा खेल पनि जितेको छैन । यो म्याच पनि हारेमा उसका खेलाडीहरू समस्यामा पर्न सक्छन् । साउदी अरब फूटबल महासंघका अध्यक्ष अदेल इज्जतले रुससँग
हारेपछि केही खेलाडीविरुद्ध अनुशासनात्मक कारवाहीको आदेश दिएका थिए । साउदी टीम यो म्याच जितेर सम्मान फिर्ता पाउन चाहन्छ ।

पहिलो म्याचमा जितेको इरानी टोलीले आज सन् २०१० को विश्वविजेता स्पेनसँग प्रतिस्पर्धा गर्दैछ । स्पेनका कप्तान सर्जिओ रामोसलाई संसारको उत्कृष्ट डिफेन्डर मानिन्छ । उनको टोलीले पहिलो म्याचमा पोर्चुगलविरुद्ध बराबरी
खेल्नुपरेको थियो । गोलकीपर डेभिड डी गीयाले यो खेलमा गोल रोक्ने भरपूर कोशिश गर्नेछन् । अघिल्लो खेलमा उनले तीन गोल खाएका थिए । 

उता इरानको टोली पहिलो म्याचमा भाग्यवश जितेको थियो । मोरक्कोले आत्मघाती गोल गरेपछि इरानलाई फाइदा पुगेको थियो र आत्मविश्वास पनि बढाएको थियो । यही आत्मविश्वासका साथ उनीहरू स्पेनविरुद्ध भिड्दैछन् ।

एजेन्सी