काठमाडौं, ६ असार - परराष्ट्रमन्त्री प्रदीप ज्ञवालीले प्रधानमन्त्री केपी ओलीको चीन भ्रमण द्विपक्षीय व्यापारिक सम्बन्ध सुधारमा फलदायी भएको बताएका छन् ।

उनका अनुसार ल्हासासम्म बनेको रेलमार्गलाई काठमाडौं जोड्न चीन तयार भएको छ । चीनले उत्तर-दक्षिण कोरिडोर निर्माणका लागि पनि सहयोग गर्ने जनाएको छ ।

तातोपानी नाकालाई पनि छिट्टै सञ्चालनमा ल्याउन चीन प्रतिवद्ध भएको परराष्ट्रमन्त्री ज्ञवालीले बुधबार बेइजिङमा आयोजित पत्रकार सम्मेलनमा जानकारी दिए ।

नेपालको पूर्वाधार चीनको प्राथमिकतामा रहेको र नेपाली उत्पादनलाई चिनियाँ बजारमा प्रवर्द्धन गर्न चीन तयार रहेको ज्ञवालीको भनाइ छ ।

आगामी नोभेम्बरमा हुने सांघाई इम्पोर्ट-एक्सपोर्ट मेलामा नेपाली उत्पादनलाई पनि सहभागी गराउने प्रतिबद्धता चीनले जनाएको समेत ज्ञवालीले जानकारी दिए ।

साथै चीन पेट्रोलियम पदार्थ उत्खननमा सघाउन पनि तयार भएको ज्ञवालीले बताए ।

‘चीनले नेपालमा पेट्रोलियम पदार्थको सम्भाव्यता अध्ययन र उत्खनन् गर्ने विषयमा पनि सहमति जनाएको छ,’ उनले भने ।

यसका साथै बीआरआईको सीमाभित्र पर्ने सबै पूर्वाधार निर्माण गर्न चीनले सहयोग गर्ने विषयमा चीनसँग सहमति भएको ज्ञवालीले जानकारी दिए ।