विराटनगर, ७ असार –सरकारले आगामी आर्थिक वर्ष २०७५/०७६का लागि ल्याएको बजेट कनिका छरेको जस्तै रहेको भन्दै आलोचना भएको छ ।

प्रदेश १ को प्रदेशसभा बैठकमा आर्थिक मामिला तथा योजना मन्त्री इन्द्रबहादुर आङ्बोले विनियोजन विधेयकमाथि विचार गरियोस् भनी राखेको प्रस्ताव पारित भएपछि विनियोजन अन्तर्गतका शीर्षकमा १३ जना प्रदेश सदस्यले धारणा राखे ।

उनीहरूले प्रदेशको समृद्धि झल्काउने प्रादेशिक गौरवका योजनाभन्दा धेरै टुक्रे योजना, तथा कार्यक्रम बजेट विनियोजन गरेको भन्दै असन्तुष्टि जनाएका छन् । नीति कार्यक्रमअनुसार बजेट आउने अपेक्षामा रहेका सांसदहरूले टुक्रे योजनामै धेरै रकम विनियोजन भएको भन्दै विनियोजन विधेयकमाथिको छलफलका क्रममा असन्तुष्टि पोखेका हुन् ।

बजेट कार्यान्वयनमा चुनौती

सत्ता पक्षका सदस्य कुलप्रसाद सम्बाले कानुन र संरचनागत कमीका कारण बजेट कार्यान्वयनमा चुनौती रहेको बताए । बजेट आयो, योजना पनि परे, रकम पनि छुट्टियो अब कहाँबाट चलाउने ? उनको प्रश्न छ ।

उनले प्रश्न गरे- ‘कहाँ जाने मेरो पैसा आयो ? भन्दै, वडा अध्यक्षकोमा जाने कि ? उपमेयरकोमा कि, मेयरकोमा जानु पर्ने हो ?’ प्रदेश सरकारले स्थानीय तहमार्फत् बजेट खर्च गर्ने व्यवस्था मिलाएको छ । सांसद विजयकुमार विश्वास, सौभाग्यवती देवी राई, उमिता विश्वकर्मा, मोहनकुमार खड्काले बजेट राम्रो भए पनि कार्यान्वायनमा चुनौती रहेको बताए ।

प्रतिपक्ष भन्छन्, बजेटमा हेपियो

संघीय समाजवादी फोरम नेपालका संसदीय दलका नेता जयराम यादवले बजेट समग्रमा राम्रो भए पनि पहुँच हुनेहरूका लागि मात्र भएको बताए । उनले बजेट कार्यान्वयनमा निक्कै चुनौती रहेको भन्दै सरकारलाई समयमै ध्यान दिन आग्रह गरे ।

विपक्षी दलका सदस्य प्रताप प्रकाश हाङवाङले बजेट कर्यान्वयनमा जटिलता रहेको बताए । धनकुटाका लिला सुब्बाले नेताहरूको निर्वाचन क्षेत्रमा मात्र बजेट तथा योजना पारिएको भन्दै विरोध गरिन् ।

बजेटमा प्रतिपक्षीलाई नअटाइएको प्रति आक्रोश पेखेकी सुब्बाले रातो किताब देखाउँदै भनिन्, ‘अरुबेला सत्तापक्ष र प्रतिपक्ष एक हौँ भन्ने बजेटमा नअटाउने ?’

त्यस्तै विपक्षी दलका प्रदेश सदस्य सूयर्माराज राईले सत्तापक्षका सांसद खुसी र प्रतिपक्षका संसद दुःखी हुनुपरेको बताए ।

उनले बजेटमा विपक्षी दलका सदस्यहरूलाई सौनेती छोराको जस्तो व्यवहार भएको गुनासो गरे । उनले पहुँचका भरमा बजेट वितरण भएको समेत बताए ।

प्रतिपक्षी सांसदहरू शिवनारायण गन्गाई, हिमाल कार्की, सञ्जाकुमारी दनुवार लगायतले बजेट सत्ता पक्षका लागि मात्र भएको आरोप लगाए ।

यस्तै सत्तापक्षकै सांसद उत्तमकुमार बस्नेतले बजेटमा विनियोजन गरिएको रकम ज्यादै कम भएको भन्दै अपुङ्गो र पञ्चामृत बाँडेको जस्तै भएको टिप्पणी गरे ।