काठमाडौं, ८ असार - प्रधानमन्त्री खड्गप्रसाद ओलीले चीनको राष्ट्रिय टेलिभिजन ‘सिजिटिएन्’ लाई अन्तर्वार्ता दिँदै नेपालको आर्थिक विकासमा चीनको सहायता महत्वपूर्ण हुने विचार प्रकट गर्नुभएको छ ।

चर्चित कार्यक्रम ‘डायलग’ (संवाद) का सञ्चालक याङ रूइका प्रश्नहरूको उत्तर दिने क्रममा ओलीले यस पटकको आफ्नो भ्रमणको मुख्य उद्देश्य चीनसितका सम्बन्धलाई सुदृढ गराउनु नै हो भन्नुभयो ।

करिव आधा घण्टाको भेटवार्ता अङ्ग्रेजीमा सञ्चालन गरिएको थियो । कार्यक्रम आज बिहान प्रसार भएको हो ।

एक प्रश्नको उत्तरमा ओलीले  नेपालका प्रधानमन्त्रीको पहिलो भ्रमण चीनमा हुने कि भारतमा भन्ने कुरा समयको उपलब्धता र अनुकूलतामा भर पर्छ, अघि-पछि भन्ने विषय महत्वको होइन भन्नुभयो ।

कार्लमार्क्सको २००औं वर्षगाँठको सान्दर्भिकता कत्तिको छ भनी राखिएको जिज्ञासाको जवाफमा नेकपाका अध्यक्ष समेत रहेका प्रधानमन्त्री ओलीले ‘शान्ति र समानता’ मा आधारित दर्शनको सान्दर्भिकता सदैव रहन्छ भन्ने विचार प्रकट गर्नुभयो । ‘हामी सिर्जनशील छौं’ भन्दै ओलीले आफूहरू अन्यत्रका कुराको नक्कल गर्ने पक्षमा नभएको जानकारी दिनुभयो ।

सगरमाथा र लुम्बिनी नेपालमा चीनका जनताले चिनिने ठाउँ हुन् भन्दै सोधिएको प्रश्नको जवाफमा ओलीले आउँदो वर्ष सगरमाथाको सफाइ अभियान थालिने कुरा बताउनु भयो । लुम्बिनी जाने पर्यटकको लागि विमानस्थलको व्यवस्था गरिँदैछ, उहाँले भन्नुभयो । चिनियाँ पर्यटकको लागि प्रवेशाज्ञा (भिसा) प्रकृया सहज गरिसकिएको छ, ओलीले थप्नुभयो ।

नेपालमा रेलसेवा शुरू गर्नेबारेमा चर्चा हुँदा प्रधानमन्त्रीले केही मानिसले शुरूशुरूमा यस परियोजनाको उपयोगिता नबुझेका हुन् ,पछि-पछि कुरो बुझ्ने छन् भन्नुभएको सुनियो ।